“AKELİK GROUP” BÜDCƏDƏN KÜLLİ MİQDARDA OĞRULUQ EDİB – 6,5 MİLYONUN İZİ İLƏ

Əlaqə:994 50 295 94 79, yenilikaz@gmail.com

“Hürriyyət”in redaksiyasına müraciət edən Cəfərov Şahin Tofiq oğlu ona qarşı haqsızlıq edildiyini bildirir. “Alke İnşaat Sanayi ve Ticaret” ASC-də ( indiki adı “”AKELİK GROUP”ASC) çalışan şikayətçi burada baş verən qanunsuzluqlarla bağlı əməkdaşımıza danışıb:

(Əvvəli bu linkdə: http://hurriyyet.org/xeber/alkelik_group_sirketi_budceden_kulli_miqdarda_ogruluq_edib_-_irketin_daha_bir_sabiq_emekdasi_bas_veren_qanunsuzluqlardan_sikayetcidir)

– Demək maliyyəçi kimi çalışsanız da, hüquqi səlahiyyətiniz olmadığından, maaş cədvəllərinin heç birində sizin imzanız olmayıb, ümumiyyətlə, nəğd pul əlinizdən gəlib keçməyib?

– Xeyr, mən heç bir mədaxil və məxaric qəbzinə imza atmamışam, nəğd pulla da heç bir işim olmayıb. Onu da deyim ki, bu vəziyyətlə bağlı, yəni maaşların rəsmi hesabat blanklarına əsasən paylanmamasına dair həm Səməd Əhmədova, həm də Ramiz Nuriyevə dəfələrlə etirazımı bildirmişəm. Amma sözlərimə məhəl qoyulmayıb. Əminəm ki, sonucda işdən çıxarılmağımın əsas səbəbi də elə bu oldu.

-Bəs sizə qarşı edilən haqsızlıqla bağlı rəhbərliyə şikayət etmisiniz?

– Dəfələrlə baş direktor Süleyman Babayevə zəng vursam da, zənglərimə cavab vermədi, sonda isə müavini Elnur Qasımov mənə zəng vurub bildirdi ki, Süleyman Babayev deyir ki, bir daha mənə zəng vurmasın, səbəbini də söyləmədi.

Səməd Əhmədov əlimdə olan sənədlərin heç birini məndən təhvil almadan (söhbət maaş cədvəllərindən gedir) çıxıb getdi. Ondan xahiş etdim ki, gəlin haqq-hesab edək. Yəni aydınlaşdıraq ki, bu vaxta qədər mənə nə qədər pul göndərilib və mənim tərəfimdən nə qədər pul xərclənib. Cavabında “Sən kimsən ki, səninlə haqq-hesab aparım? Sən bizim işçimiz deyilsən, səni 2017-ci ilin aprel ayında işdən qovmuşuq. Mən səni heç tanımıram da!” sözlərini eşitdim.

– Bu, necə ola bilər? 2018-ci ilin mart ayına qədər Hacıqabul layihəsində çalışmısız axı.

– Elə mənə də bu məsələ maraqlı gəldi. Bakı şəhərinə gəldim, məqsədim Süleyman Babayevlə görüşüb vəziyyətə aydınlıq gətirmək idi. Dəfələrlə zəng vursam da, zənglərimə cavab vermədi, məcbur qalıb başqa nömrədən zəng vurdum, bu dəfə dəstəyi qaldırdı. Ondan yaranmış vəziyyətə aydınlıq gətirməyi xahiş etdikdə mənə dedi ki, sən adam döymüsən. Təbii ki, buna etiraz etdim və ondan xahiş etdim ki, görüşüb danışaq və məsələni araşdıraq. Amma xahişimi qəbul etmədi və mənə söylədi ki, sən vəzifəndən sui-istifadə etmisən. Buna cavab olaraq ona Baş prokuror yanında Korrupsiyaya qarşı Mübarizə Baş İdarəsinə şikayət edəcəyimi bildirdim. Dedi: “Hara gedirsən get, kimə şikayət edirsən, et!”

Bu ilin aprel ayında Baş prokuror yanında Korrupsiyaya qarşı Mübarizə Baş İdarəsinə şikayət məktubu ilə müraciət etdim. Adıçəkilən qurum məni Vergilər Nazirliyinə və Dövlət Sosial Müdafiə Fonduna yönləndirdi.

Şikayət məktubunda bildirmişdim ki, işlədiyim şirkətdə hüquqlarım tapdalanıb, əsassız yerə işdən qovulmuşam. Buna cavab olaraq sözügedən şirkətin DSMF-ə göndərdiyi məktubda yazılıb ki, guya, mən 2017-ci ilin fevral ayında işdən azad edilmişəm və mənimlə son haqq-hesab edilib və 4 min manat ödənilib. Bütün sənədlərin əsli məndədir…

“Padarçöl layihəsi”nin icrası zamanı sahə rəisi vəzifəsini icra edən Tofiq Əliyev 2018-ci ilin aprel ayına qədər həmin layihədə çalışdığımı rəsmən təsdiq edəndən sonra cari ilin may ayında Süleyman Babayev Elnur Qasımovdan mənə sifariş göndərdi ki, şikayət ərizələrimi geri götürüm və bunun müqabilində məni yenidən işə qaytaracağına və əlavə iş saatlarımın (haradasa 8 aydan söhbət gedir ki, bu da 16 min manata yaxın puldur) pulunu ödəyəcəyinə söz verdi.

Vədlə yanaşı təhdid də olundum. Elnur Qasımov mənə bildirdi ki, Süleyman Babayebv Qaçqınların və Məcburi Köçkünlərin İşləri üzrə Dövlət Komitəsinin sədri, Milli Məclisin deputatı Rövşən Rzayevin yaxın dostudur, dediklərimizlə razılaşmasan, səninçün yaxşı olmayacaq. Sonra öyrəndim ki, Süleyman Babayevin Rövşən müəllimlə yaxın münasibəti yox imş və başa düşdüm ki, məni aldadıblar.

Elnur Qasımov telefonla mənə söylədi ki, biz səhv edib səni işdən çıxarmışıq, xahiş edirəm, Əmək Müfəttişliyinin qarşısına gəl və sənə təqdim edəcəyimiz müqaviləni imzala(bütün telefon zəngləri telefonumda qeyd edilib, istənilən vaxt təqdim etməyə hazıram).

Mən onların vədlərinə aldanıb xahişi yerinə yetirdim. İmzaladığım müqavilədə qeyd edilmişdi ki, şirkət mənə 24 min manat ödəyib, əlavə iş saatlarımın pulu da ödənəcək və mən işə qaytarılacağam.

Onların xahişi ilə şikayət etdiyim bütün qurumlardan şikayət ərizələrimi geri götürdüm, son ərizəmi Vergilər Nazirliyindən geri götürdüm, çünki şirkət adını dəyişdirirdi, “Alke Group”ASC kimi qeydiyyatdan keçirdi, mənim şikayətim isə buna mane olurdu.

Amma gedib yoxladanda məlum oldu ki, nə DSMF bazasında, nə də Vergilər Nazirliyinin bazasında 2017-ci ildən sonra işçi kimi adım qeyd edilməyib.

Bu hadisədən sonra dəfələrlə Süleyman Babayevə zəng vurdum, hər dəfə bir bəhanə ilə məni başından etdi. Sonra isə ümumiyyətlə zənglərimə cavab vermədi, nömrəmi qara siyahıya daxil etdi. Dekabrın 7-də ATS-in avtomat nömrəsindən ona zəng vurdum. Dəstəyi qaldırıb mənə dedi ki, sənə veriləsi işim yoxdur, daha məni narahat etmə.

Dekabrın 10-da Elnur Qasımovla telefon bağlantısı qurdum, ona dedim ki, günah sizdədir, siz məni saxta müqavilə imzalamağa məcbur etdiniz. Elnur Qasımov sözlərimi təsdiq etdi və məndən bir gün vaxt istədi.

Amma ona vaxt verməyəcəyimi və mənə qarşı edilən qanunsuz hərəkətlərlə bağlı müvafiq qurumlara şikayət edib, onları məni ifadəmi dəyişməyə məcbur etməkdə günahlandıracağımı bildirdim.

Yaxın günlərdə aidiyyatı qurumlara, o cümlədən də məhkəməyə müraciət edəcəyəm.

-Söhbətimizin sonunda bir daha konkret olaraq kimdən və nədən şikayətçi olduğunuzu və qanun yolu ilə nəyə nail olmaq istədiyinizi qısaca bildirmənizi xahiş edirik.

– Məni aldadıb, hədə və vədlərlə şikayət ərizələrimi geri götürməyə, ifadələrimi dəyişməyə məcbur edən şəxslərlə bağlı tədbir görülməyini, 8 ay müddətində ödənilməyən əlavə iş saatlarımın pulunun ödənilməsini xahiş edirəm. Xahiş edirəm ki, adıçəkilən şirkətin işi ciddi araşdırılsın və yol verilən qanunsuzluqlar üzə çıxarılsın.

Related Articles

+994 50 295 94 79
top