Yenilik.Az
www.Yenilik.Az » Cəmiyyət » İranlı jurnalistin nataraz sualı təsadüfi deyildi — ŞƏRH

İranlı jurnalistin nataraz sualı təsadüfi deyildi — ŞƏRH

İranlı jurnalistin nataraz sualı təsadüfi deyildi — ŞƏRH
2021-02-27 , 16:49

""Mehr" Agentliyi 2003 də təsis edilib, fars, ingilis, ərəb, kürd, türk və urdu dillərində xəbərlər yayımlayır.  Agentliyin təsisçisi İslam İdeologiyasını Təbliği Təşkilatıdır (Islamic Ideology Dissemination Organization). Təşkilat mərhum Ruhulla Xomeyninin "İslam mədəniyyətini və ideologiyasını inkişaf etdirmək və təbliğ etmək məqsədi ilə" verdiyi bir fərmanından sonra 22 iyun 1981-ci ildə qurulub. Birbaşa ali dini rəhbərə tabedir. Ona görə "Mehr" yayım siyasətində daha ehtiyatlı davranır, region ölkələri arasında əməkdaşlıq və dostluq əlaqələri haqda rəsmi gəlişigözəl ritorikanı aşan xəbər, rəy, mövqe, adətən, təqdim etmir".


Demokrat.az xəbər verir ki, bu barədə tanınmış jurnalist Cəmaləddin Quliyev sosial şəbəkə hesabında yazıb.

O qeyd edib ki, servis dillərindən və xaricdəki müxbir məntəqələrin arealından göründüyü qədər əsas xəbər prioritetləri Yaxın və Orta Şərq, Mərkəzi Asiya ilə bağlıdır, hədəf auditoriyası da bu bölgə ilə bağlı xəbərləri izləyən kütlədir:

"Azərbaycandakı həmkarları ilə rəsmi tərəfdaşlıq müqavilələri var. İndiyədək Azərbaycan və Türkiyə ilə bağlı ən neytral xəbər təqdim edən İran agentliklərindən biri, bəlkə də birincisidir. Dünən Azərbaycan Prezidentinin mətbuat konfransında "Mehr"-in jurnalisti tərəfindən səsləndirilən nataraz suala gəlincə, təsadüf deyildi. Sualda səsləndirilən ittiham İkinci Qarabağ müharibəsi gedişində və sonradan  İranın ən azı 4 ali rəsmi instansiyası tərəfndən  bu və ya digər formada dilə gətirilib. Cənab Prezidentin suala cavabında mənbə göstərilməsi ilə bağlı bir neçə dəfə təkrar israr etməsi əslində həmin mərcilərin-instansiyaların adlarının səsləndirilməsinə nail olmaq idi. Dediyi "dost ölkədən gəlmisiniz, ona görə də mən mövzunun dərinliyinə getmək istəməzdim. Ancaq xahiş edirəm, belə şayiələr yayarkən daha məsuliyyətli olun" sözləri həmin ali və yarım ali mərcilərə verilən cavab kimi dəyərləndirilə bilər". Jurnalist C.Quliyev müharibədən sonra İran parlamentində Şərqi Azərbaycan vilayətini təmsil edən deputatlardan birinin çox ibrətamiz çıxışına da diqqət çəkib:

"Deputat deyirdi ki, biz istəsəydik, indiyədək buraxdığımız yanlışları aradan qaldıra, sözlərimizlə, davranışımızla dost Azərbaycan xalqının qəlbini qazana bilərdik. Sonra səhvləri mövcud Həsən Ruhani iqtidarının ayağına bağlayırdı. Bəlkə də deputat haqlıydı, hansısa səhvlər cari administrasiya ilə bağlıdır. Amma "Mehr" mövcud  admnistrasiyaya bağlı deyil və onun fikirlərini ifadə etmir, birmənalı. Mövzuya dəxli olmayan bir haşiyə. Üzeyir bəyin "Arşın malalan" operettası bəzi Şərq ölkələrində vaxtilə "Çadra altında mehr (məhəbbət) və məkr" adıyla səhnələşdirilmişdi".

Redaksiya ilə əlaqə: (+994) 50 295 94 79 | [email protected]
XƏBƏR LENTİ

Materiallardan istifadə edərkən sayta mütləq istinad olunmalıdır. Bütün hüquqlar qorunur.