Qüdrət Qurbanovla bağlı sensasion iddialar — Azərbaycanda yığdığı pulları xaricdə kazinolarda uduzub...

Qüdrət Qurbanovla bağlı sensasion iddialar — Azərbaycanda yığdığı pulları xaricdə kazinolarda uduzub... Dövlət Dəniz Agentliyinin rəhbəri Qüdrət Qurbanovun sərgüzəştləri, ey-işrət həyatı və qumardu uduzduğu pullar haqqında sosial şəbəkələrdə xəbərlər yayılıb. [banner_yaziortasi]{banner_yaziortasi}[/banner_yaziortasi]

Demokrat.az xəbər verir ki, sözügedən məlumatlarda Qüdrət Qurbanovun oğlu Orxan Qurbanovun İstanbulda “Tramp Tover” binasından sahəsi 300 kv/m olan bir mərtəbəni 4,5 milyon avroya tam aldığı iddia olunur.


Məlumatda o da iddia olunur ki, Qüdrət Qurbanov Azərbaycanda qazandığı pulları xarici ölkələrdə kazinolarda uduzur.


"Belə ki, o, Bolqarıstanda 41 min 500 avro, Londonda 19 min funt, Monte Karloda De-Pare kazinosunda 1 milyon dollara yaxın, Çexiyada PUB kazinosunda 25 min avro uduzub. Onun Monte Karloda ofşor şirkəti, sahəsi 2000 kv/m olan villası var. 2013-cü ildə Soçi gözəli seçilən və milliyətcə erməni olan qızı Azərbaycana gətirdiyi üçün qalmaqalla üzləşən Qüdrət Qurbanovun qızlarla əyləncələri tez-tez baş tutur. O, məmurlara məxsus yaxtalarda əyləncələr təşkil edir, hətta həmin yaxtaların birini ələ keçirib.


Qüdrət Qurbanovun İranda qudaları ilə birgə qurduğu 40 milyon dollarlıq neft zavodunun olduğu da bildirilir.


Vaxtilə keçmiş milli təhlükəsizlik naziri Eldar Mahmudovun yaxın adamlarından biri olan Qurbanovun oğlu MTN-də yüksək vəzifə tutsa da, Mahmoduv nazir postundan çıxarılan kimi o da işdən azad edilib.


Qüdrət Qurbanov və əlaltıları Agentliyi bazara çevirib. Burada dənizçilər üçün sertifikat və sürücülük vəsiqəsi əvvəllər 3-5 min manata satılırdısa indi bu qiymət 10 min manata qalxıb. Hətta burada ağır şəraitdə çalışan dənizçilərə verilən cüzi maaşları da müxtəlif yollarla onların əlindən alır. Belə ki, dənizçilər dənizə çıxmaq üçün Dövlət Dəniz Administrasiyasından sertifikat almalıdır. Əslində bu sertifikatlara görə heç bir ödəniş tələb olunmur. Amma Qüdrət Qurbanovun qurduğu sistem dənizçilərin cibinin soyulmasına çevirilir.

Mənbənin dediyinə görə, administrasiyasa rəhbərliyi sertifikatları dənizçilərə 120-150 min manata satır. Bu məbləği ödəməyənlər isə təbii olaraq dənizə buraxılmır. İşsiz qalmaqdan qorxan dənizçilər məcburiyyət qarşısında qalaraq həmin məbləği ödəməli olurlar.


Qüdrət Qurbanov və adamları sertifikatla yanaşı, diplom alveri ilə də məşğul olur. Dənizçilərin verdiyi məlumata görə, administrasiya rəhbərliyi matros diplomunu 2500-3000, bosman diplomunu 4000-5000 manata satır. Üstəlik bu diplomların dəyişdirilməsi zamanı da dənizçilərdən müəyyən məbləğ alınır. Şikayətçilər deyir ki, artıq dənizçilər bu özbaşınalıqlardan bezib.


Qüdrət Qurbanov əsasən azyaşlı qızlarla eyş-işrət məclisləri qurur. Hətta, onun məşhur məmurlardan biri ilə tez-tez Rəşid Behbudov küçəsindəki yeni tikilən binanın 15-ci mərtəbəsindəki evdə eyş-işrət məclisləri təşkil etdiyi bildirilir. Qurbanov həmin binanın 15-ci mərtəbəsini tam alıb və özünə gizlin görüş yerinə çevirib. Bu yaxınlarda Qüdrət Qurbanovun toruna düşən qızlardan biri qorxudan ölkəni tərk edib. Qurbanov bununla kifayətlənməyərək yenə də yeniyetmə qızlarla əylənməkdə davam edir", - deyə yayılan məlumatlarda qeyd olunur.


Ümumiyyətlə, Qüdrət Qurbanovun adı son dövrlər bir çox qalmaqallarda hallanır. Dövlət Dəniz Administrasiyasının rəhbərinə qarşı çıxış edənlərdən biri mərhum hüquqşünas Əyyub Kərim olub.

Hüquqşünas sağlığında bildirirdi ki, Qüdrət Qurbanov onun müdafiə etdiyi gəmini qanunsuz yollarla ələ keçirib.


Əyyub Kərimin sözlərinə görə, Qəmbər Səfərov adlı şəxs 2003-cü ildə Rusiyanın Həştərxan vilayətindən gəmi alıb:


"Qüdrət Qurbanov mənim müdafiə etdiyim şəxsə məxsus gəmini dələduzluq yolu ilə ələ keçirilməsində bilavasitə rol oynayıb. "Yunıy Moryak” adlı bu gəmi ilə bağlı alqı-satqı müqaviləsi 2003-cü il fevralın 20-də imzalanıb. Fevralın 28-də təhvil-təslim işləri yekunlaşıb. Bundan sonra Qəmbər Səfərov bir neçə ay gəmini təmir etdirib. Gəmi Bakıya gətiriləndən sonra hansısa "Mərdəkan Broyler” adlı şirkət Dövlət Dəniz Administrasiyasının dəstəyilə gəmini ələ keçirib. Saxta alqı-satqı müqaviləsi tərtib olunub. Müqavilənin saxta olduğunu sübut edən kifayət qədər fakt var. Bir neçəsini sadalamaq istəyirəm. Təsəvvür edin, Qəmbər Səfərov gəmini fevralın 20-də alıb. Amma "Mərdəkan Broyler”lə Qəmbər Səfərov arasında imzalandığı iddia edilən saxta müqavilədə tarix yanvarın 9-u göstərilib. Belə çıxır ki, Qəmbər Səfərov hələ gəmini almamış "Mərdəkan Broyler” bu əmlakı ondan satın alıb.


Digər tərəfdən, "Mərdəkan Broyler”lə Qəmbər Səfərov arasındakı bu saxta müqavilə rus dilində tərtib olunub. Azərbaycanın dövlət dili Azərbaycan dilidir. Alqı-satqı Azərbaycanda həyata keçirilirsə, niyə müqavilə rus dilində tərtib olunub? Niyə pulun məbləği rublla göstərilib? Məgər Azərbaycanın milli valyutası manat deyil? Əslində bu saxta müqavilə Qəmbər Səfərovun Həştərxanda bağladığı müqavilədən hərfbəhərf köçürülüb. Hətta oradakı texniki səhvlər də eynilik təşkil edir. Bundan başqa müqavilədə göstərilir ki, Qəmbər Səfərov gəmini 250 min rubla alıb. Təmir işlərinə də pul xərcləyib və daha sonra 181 min rubla "Mərdəkan Broyler”ə satıb. Sual olunur: Qəmbər Səfərov niyə gəmini 250 min rubla alıb 181 min rubla satmalıdır? Bəs bunun xeyri?”


Əyyub Kərim bildirib ki, Bakı Apellyasiya Məhkəməsi gəminin Qəmbər Səfərova məxsus olması və "Mərdəkan Broyler”ə verilmiş mülkiyyət şəhadətnaməsinin ləğvi barədə qətnamə çıxarıb: "Amma qətnamə bu günə qədər icra olunmayıb. Mən Qəmbər Səfərovla Ədliyyə Nazirliyi icra baş idarəsinin rəisi Xanlar Zeynalovun qəbulunda olmuşam. Xanlar müəllim dedi ki, qətnamədə göstərilən hallar birgə icra olunmalıdır”.


Yazıda yer alan ittihamlarla bağlı Dövlət Dəniz Agentliyinin rəhbəri Qüdrət Qurbanovun fikirlərini öyrənməyə çalışsaq da, telefon zənglərimizə cavab verən olmayıb.


Demokrat.az
Geri qayıt