"Azərbaycan Respublikası Cinayət Məcəlləsinə əsasən on dörd yaşı tamam olmuş şəxs qəsdən sağlamlığa az ağır və ya ağır zərər vurmağa görə cinayət məsuliyyətinə cəlb edilir. Əgər 14 yaşı tamam olmamışdırsa onun barəsində tərbiyəvi xarakterli məcburi tədbirlər tətbiq oluna bilər".Bunu "Operativ Media"ya Vəkil Turan Abdullazadə bildirib.
O, qeyd edib ki, yetkinlik yaşına çatmayanlara cəza növləri təyin edilir:
"Həmin yeniyetmə cərimə, ictimai işlər, islah işləri,azadlığın məhdudlaşdırılması və müəyyən müddətə azadlıqdan məhrum etmə ilə cəzalandırılır. Azadlıqdan məhrum etmə yetkinlik yaşına çatmayanlara on ildən çox olmayan müddətə təyin edilir.
Yetkinlik yaşına çatmayan ilk dəfə böyük ictimai təhlükə törətməyən və ya az ağır cinayət etdikdə, tərbiyəvi xarakterli məcburi tədbirlər tətbiq etməklə onun islah olunması mümkün hesab edilərsə, həmin şəxs cinayət məsuliyyətindən azad edilə bilər.
Yetkinlik yaşına çatmayanlara tərbiyəvi xarakterli xəbərdarlıq, valideynlərin və ya onları əvəz edən şəxslərin və yaxud müvafiq dövlət orqanının nəzarətinə vermək, vurulmuş ziyanın aradan qaldırılması vəzifəsini həvalə etmək və yetkinlik yaşına çatmayanın asudə vaxtını məhdudlaşdırmaq və onun davranışı ilə bağlı xüsusi tələblər müəyyən etmək kimi tədbirlər tətbiq edilə bilər".