“İmam Hüseynə görə Məhərrəm ayında toy etməmək doğru deyil”

“Nə Ramazan, nə də Məhərrəm ayında toyların olub-olmaması barədə “Qurani-Kərim”də, hədislərdə heç bir göstəriş yoxdur. Bunu hələ 2021-2022-ci illərdə də demişəm. İslamda hər hansı ayda toy olmaması barədə ümumi şəkildə heç bir hökm yoxdur. Bu, şiələrin başqa müsəlmanlardan seçilmək üçün ortaya qoyduqları bir məsələdir. 

Ramazanda və Məhərrəm ayında toy etmirlər. Həm sevinc, həm kədər vaxtı toy olmalı deyilsə, bəs nə vaxt olmalıdır? Bu, artıq sual altında qalır. Allah kişi və qadını yaradıb ki, onlar insan nəslini artırsınlar. Nə qədər çox toy olsa, bir o qədər böyük savab qazanmış olursan. Hətta İslamda belə bir qayda da var ki, cavan oğlan evlənəndə evləndiyi günə qədər etdiyi bütün günahlar əfv olunur. Yəni gənc oğlanın evlənməsi savabdır. Bu nöqteyi-nəzərdən İslam dini evliliyi təşviq, təbliğ edir, evlilik üçün kifayət qədər şərait yaradır...” 
Bu sözləri Pravda.az-a müsahibəsində Dini Qurumlarla İş üzrə Dövlət Komitəsinin sabiq sədri, professor Rafiq Əliyev deyib.
O bildirib ki, Ramazan ayında toy edilməməsini başa düşmür: “Deyirlər ki, guya toyda içki içəcəklər, bu da müsəlmana olmaz. Onsuz da, nəinki Ramazanda, müsəlmana heç vaxt içki içmək olmaz. Ramazan ayında axşam iftardan sonra toy etmək bütün ərəb ölkələrində ən böyük savab hesab olunur. Belə toyları həm Birləşmiş Ərəb Əmirliklərində, Suriyada, Misirdə, həm də İraqda oxuyarkən dəfələrlə görmüşəm. Axşam iftardan sonra toylarını edirlər, gecə saat 3-4-ə qədər yatmırlar. Yeyib-içirlər, gəzirlər, söhbət edirlər... Bu da savabın bir hissəsidir. Ramazan ayında evlənmək cavanlar üçün şərəf sayılır ki, mübarək ayda ailə qurublar. Bu ailənin gələcəyi daha uğurlu ola bilər. Məhərrəm ayında isə dəqiq bilmirik ki, İmam Hüseyn nə vaxt qətlə yetirilib. Qəməri təqvimlə Günəş təqvimi arasında 10 gün fərq var. Hər il bütün müsəlman tədbirləri 10 gün geriyə çəkilir. Belə olduğu halda nə Məhəmməd Peyğəmbərin anadan olduğu günü dəqiq bilirik, nə də digər səhabələrin yas günlərini”. 
R.Əliyev deyib ki, Ramazan və Məhərrəm aylarında toy etməmək adət halını alıb: “Sovet dönəmində insanlar bir yerə toplaşmaqda çətinlik çəkirdilər. Ona görə də bu adətləri saxlayıb, indi ortaya çıxarıblar. Sovet dövründə belə şeylər yox idi, kim istəyirdisə, toyunu edirdi, problem olmurdu. Daxilən razılıq verirəm ki, müsəlmanların İmam Hüseynə olan məhəbbətlərinin xatirinə Aşura günü toy olmaya bilər. Amma Məhərrəm ayında bütün qalan günlər kim istəsə, toyunu edə bilər. Xalqımızın arasında həm şiələr, həm sünnilər var. Biz şiəyiksə, niyə sünniləri toy etməkdən məhrum etməliyik? Onların belə bir problemləri yoxdur. İmam Hüseynin ölümünə, onun şəxsiyyətinə sünnilərin də hörmətləri var. İmam Hüseynin ölümünə narahat ola bilərlər, amma şiələrin qayda-qanunlarına tabe olmağa məcbur deyillər. Sünniləri Ramazanda, Məhərrəm ayında toy etməməyə məcbur etmək olmaz. Bütün bunlar insanların fikirləşib ortaya çıxardıqları məsələlərdir. Bu, Qafqaz Müsəlmanları İdarəsinin Qazilər Şurasının verdiyi fətvasıdır, qeyri-qanunidir. Əslində, İslamda iyerarxiya yoxdur. Kimsə molla, yaxud molladan bir az böyük olsun - İslamda belə şeylər yoxdur. İnsanlar sərbəst şəkildə toy edə bilərlər. Onlar bununla heç bir günah işlətmiş olmurlar. Toy etdikləri üçün insanlara heç bir cəza tədbiri də tətbiq olunmayacaq. Bütün bu mövhumat məsələrini ortaya qoymaq lazım deyil. Qazilər Şurası səhv qərar verib, belə qərar verməli deyil. Bu, onların səlahiyyətlərində deyil. Qazilər Şurası ictimai təşkilatdır. İctimai təşkilat cəmiyyətə öz iradəsini yeridə bilməz. Bunu da nəzərə almaq lazımdır. Kim sənə toyu qadağan edir? Buna səlahiyyəti varmı? Yoxdur. Əsas məsələ də budur”.