"Crocus City Hall"un bərpası ilə bağlı yekun qərar qəbul edilməyib - Emin Ağalarov

"Crocus City Hall"un bərpası ilə bağlı yekun qərar qəbul edilməyib.

 
Bu barədə "Crocus Group"un vitse-prezidenti Emin Ağalarov "Rossiya-24" televiziya kanalına müsahibəsində deyib.
 
O, konsert zalının bərpası ilə bağlı Rusiya prezidenti Vladimir Putin və Moskva vilayətinin qubernatoru Andrey Vorobyovun fikrinə, eləcə də ictimai fikrə əsaslanacaqlarını bildirib.
 
Qeyd edək ki, "Crocus City Hall"da törədilən terror aktında ölənlərin sayı 143 nəfərə çatıb.
 
Xatırladaq ki, martın 22-də Rusiyanın Moskva vilayətinin Krasnoqorsk şəhərində yerləşən "Crocus City Hall"a daxil olan naməlum şəxslər insanlara atəş açıblar. Hadisə "Piknik" qrupunun konsertindən öncə baş verib.
 
Rusiya Federal Təhlükəsizlik Xidmətinin rəhbəri Aleksdanr Bortnikov Rusiya prezidenti Vladimir Putinə Moskvada "Crocus City Hall"da törədilən terror aktında iştirak edən 11 nəfərin, o cümlədən 4 terrorçunun saxlanıldığı barədə məlumat verib.
 
Xəsarət alanların xilas edilməsi və axtarışı üzrə bütün tədbirlər yekunlaşıb.
 
"Crocus City Hall" konsert zalında terror aktı törətməkdə ittiham olunan şəxslər barəsində həbs qətimkan tədbiri seçilib. Beləliklə, məhkəmənin qərarı ilə terror aktını törətməkdə ittiham olunan Dalercon Mirzoyev, Saidakrami Raçabalizoda, Şamsidin Fariduni və Mahammadsobir Fayzov istintaq təcridxanasına yerləşdirilib./Trend