Oğlu bəraət alan ana Vəkillər Kollegiyasının rəhbərliyinə təşəkkür etdi

Bakıda oğlu bəraət alan ana Vəkillər Kollegiyasının rəhbərliyinə təşəkkür edib.

 
Yenilik.az-ın əldə etdiyi məlumata görə, bu barədə məktub Kollegiyanın sədri Anar Bağırova göndərilib.
 
Vətəndaş Sənəm Əliyeva (ad, soyadı şərti) təşəkkür məktubunda qeyd edib ki, oğlu Mahir Əliyev (ad, soyadı şərti) uzun illər paytaxt ərazisində yerləşən poçt idarələrinin birində mühəndis vəzifəsində çalışıb, daha sonra narkotikə görə həbs olunub. Bu işlə əlaqədar olaraq, vəkil Azər İbrahimov dövlət hesabına vəkil təyin edilib. Vəkil bütün instansiya məhkəmələrində Mahir Əliyevi müdafiə edib. 
 
Qadının sözlərinə görə, Binəqədi Rayon Məhkəməsi onun oğluna bəraət verib. Hökmdən narazı qalan dövlət ittihamçısı apellyasiya protesti ilə Bakı Apellyasiya Məhkəməsinə müraciət edib. Məhkəmə hökmü qüvvədə saxlayıb. Daha sonra prokuror kassasiya protesti verib. Ali Məhkəmə də hökmü dəyişdirməyib.
 
Sənəm Əliyeva bildirib ki, vəkil Azər İbrahimov övladının hüquqlarının müdafiəsi üçün kifayət qədər dəstək olub: “Mahir Cinayət Məcəlləsinin 234.1-ci (narkotik) maddəsi ilə həbs olunduğu gündən Azər müəllim mütamadi olaraq, konfidensial görüşlər keçirib, nəticədə o, oğlumun günahsız olduğunu müəyyən etməkdə əlindən gələni etdi. Vəkil Mahirin günahsız olduğunu sübut edən kamera görüntülərini peşəkar fəaliyyəti ilə ortaya çıxardı. Nəticədə 9 ay müddətində günahsız olaraq həbs olunan övladım bəraət aldı”. 
 
O, məktubunda Azər İbrahimovdan razı qaldığını söyləyib:

“Hər kəsə məlumdur ki, son dövrlərdə Vəkillər Kollegiyasının fəaliyyətində kifayət qədər irəliləyişlər var. Bunun üçün sizə və dəyərli kollektivinizə təşəkkür etmək istəyirəm. Vəkil Azər müəllimdən çox razı qaldıq. Bir ana kimi, belə vəkillərimizə dəyər verməyinizi xahiş edirəm”.