Sumqayıt-Bakı ekspress qatarı “PAZ” avtobusuna çevrilir? (FOTOLAR)

Bu gün Sumqayıt şəhərindən yeni qrafiklə saat 07:48-də Bakı istiqamətinə hərəkət edən Ekspress qatarında böyük sıxlıq yaranıb. Sərnişinlər ayaq üstə qalıb və böyük narahatlıq keçirib. Amma Sumqayıt stansiyasından qatara minəndə dispetçerlər bildirirdi ki "...buyurun, qarşı vaqonda boş yerlər var..." Təsəvvür edin ki, əslində isə boş yerlər dedikləri ayaqüstü yerlər imiş. Bu sıxlıq Xırdalan və Biləcəri stansiyalarında pik həddə çatıb.

Məlum olub ki, qatarın vaqonlarının sayı xeyli azaldılıb - vaqon sayı da 11-dən 7-yə endirilib. Özü də məhz həftənin əvvəli, bazar ertəsi. İndi də rayonlara gedənlərə görəmi?!

Maraqlıdır ki, buna qədər Express qatarının vaqon sayındakı qeyri-stabillik əsasən cümə günləri və bayramlar öncəsi olurdu. Daha əvvəl Sumqayıt sakinlərinə qarşı bu haqsızlığa rayonlara səfər edənlərin say çoxluğu, yüksək tələbatla haqq qazandırırdılar. 
Bəs bu gün - həftənin əvvəli nə baş verdi?

Ümumiyyətlə, nə üçün istədikləri vaxt vaqon sayını azaldıb bölgələrə hərəkət edən qatarlara qoşmalıdırlar?! Məgər Sumqayıtdan Bakıya hərəkət edənlər pulunu ödəyib rahatlıq istəyən sərnişinlər deyil?!

Və nə üçün öncədən birdəfəlik elan edilmir ki, məsələn, ekspress qatarında vaqonlar azalacaq, daha 7 vaqon olacaq, agah olun! Sərnişinlər bunu əvvəldən bilib ya Pirşağı qatarına minmək üçün yeraltı keçid istiqamətində hərəkət etsinlər, yaxud vağzala gəlmə zamanlarını digər reyslərə uyğun planlasınlar.

Problemlər bununla bitmir. Daha betəri isə budur ki, Sumqayıtdan Xırdalan yolu ilə Bakı istiqamətində sürət qatarlarında vaxtilə 07:25, 07:35, 07:45, 08:00 kimi daha praktik reyslər olsa da, hazırda onların hər biri tarixin yaddaşına qovuşub. Saat 07:20-dən 08:12-dək olan intervala 2 dənə köhnə tipli vaqonları azaldılmış və hər stansiyada dayanması səbəbindən böyük sıxlıq olan köhnə tipli Express qatarları fəaliyyət göstərir. Əvvəllər təhlükəsizlik baxımından platforma ilə qatarın ensiz olması səbəbindən arada boşluq olduğu üçün pandus da qoyurdular. Daha bunu da yığışdırdılar.  Və artıq bu "expresslər" sıxlığına və narahatlığına görə 90-cı illərdə Sumqayıt-Bakı yolu işləyən "PAZ” avtobuslarını xatırladır. Görəsən, biz keçmişə qayıdırıq, ya inkişaf etmək istəyirik? Bəlkə bu qərarı verənlər nostalji yaşamaq istəyir?

Axı "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın təsdiq edilməsi haqqında Azərbaycan Respublikası Prezidenti İlham Əliyevin Sərəncamı var. Bu sərəncamdan irəli gələn böyük işlər və məsuliyyətli fəaliyyətlər gözlənilir. Amma beləmi?!...
Qazancınızı, rentabelli çalışmaq istəklərinizi normal qarşılayırıq, amma insanların rahatlığını da düşünün, cənablar!

Edilən müraciət əsasında qarşı tərəfin də mövqeyi işıqlandırılacaq.

Elnur Ağayev 
Xeberle.com