Taksi sürücüsü sərnişinə əxlaqsız təklif etdi – VİDEO

“Bolt” taksi şirkətinin sürücüsü sərnişinə qarşı qeyri-etik münasibət göstərib.

 
Tribuna.az xəbər verir ki, bu barədə iddianın yer aldığı görüntülər sosial şəbəkədə paylaşılıb.
 
Sərnişin paylaşımında qeyd edib ki, əvvəlcədən ailəli olduğunu söyləsə də, sürücü münasibət qurmağa cəhd edib:
 
“Mənimlə Azərbaycan və rus dilində, işarələrlə qarışıq danışmağa başladı, üstəlik, bir neçə dəfə ön oturacaqda əyləşməyimi istədi.
 
Puldan söhbət gedən hissədə məndən çaypulu istədi. Taksi üçün 14 manat ödəmişdim, amma o dedi ki, “Biz uzağa gedirik, mənə də 5 manat saxla”. Mən isə dedim ki, yanımda artıq pul yoxdur. Buna cavab olaraq dedi: “Axı sənin ərin var, qoy o versin”.
Ünvana çatanda isə sağollaşmaq bəhanəsi ilə əlimi sıxmaq istədi. Amma bununla kifayətlənmədi, fürsətdən istifadə edib mənə toxundu. Belə vəziyyətlərdə, adətən, şok keçirirəm, ona görə də istər-istəməz gülümsəyərək reaksiya verirəm. Hadisəni videoya çəkməyimin səbəbi də baş verənləri başqalarına göstərmək və bunun uydurma olmadığını sübut etməkdir. Belə hallar baş verməməlidir. Xüsusilə də qadın əvvəlcədən ailəli olduğunu dediyi, söhbətdə maraqlı olmadığını açıq şəkildə bildirdiyi halda”.
 
Məsələ ilə bağlı “Bolt” taksi şirkətindən Oxu.Az-ın sorğusuna cavab olaraq bildirilib ki, şirkətin əsas məqsədi sərnişinlər və tərəfdaş sürücülər üçün rahat, təhlükəsiz və keyfiyyətli xidmət təmin etməkdir:
 
“Platforma üzərindən qəbul edilmiş sifarişlərin məsafəsindən və ya ödəniş üsulundan asılı olmayaraq yerinə yetirilməsi gözlənilir.
 
Sürücünün sərnişindən əlavə ödəniş tələb etməsi, sifarişi ləğv etməsini xahiş etməsi, əsassız səbəbdən sifarişi ləğv etməsi, sərnişinə qarşı qeyri-peşəkar davranması, o cümlədən narahatlıq yaradan şəxsi suallar verməsi və ya hər hansı digər uyğunsuz davranış nümayiş etdirməsi platformanın qaydalarına ziddir və qəbuledilməzdir. Bu kimi hallarla qarşılaşan sərnişinlərdən hadisə barədə tətbiq vasitəsilə məlumat vermələri xahiş olunur. Daxil olan hər bir müraciət araşdırılır və qaydaların pozulduğu təsdiqləndiyi hallarda müvafiq tədbirlər görülür.
 
“Bolt”un dəstək xidməti daxil olan bütün müraciətləri araşdırır. Şikayət təsdiqləndiyi təqdirdə sürücü ilə əlaqə saxlanılır, bu hallar onun reytinqinə təsir göstərir və təkrarlanarsa, hesabın deaktiv edilməsinə qədər tədbirlər görülə bilər.
 
Qeyd etmək istərdik ki, “Bolt” sürücülərlə mütəmadi olaraq kommunikasiya aparır, onlara platforma qaydaları, müştəri məmnuniyyətinin əhəmiyyəti və peşəkar xidmət standartları barədə məlumatlar təqdim edir. Məqsədimiz həm sərnişinlərin rahatlığını və təhlükəsizliyini, həm də platformada göstərilən xidmətin keyfiyyətini yüksək səviyyədə saxlamaqdır”.Oxu.Az