Avtobus sürücüsü “Lənkəran Sərnişin“ ASC sədrindən şikayətçidir-FOTO

Lənkəran rayonun Göyşaban kənd sakini İbayev Əli Satulla oğlu “Lənkəran Sərnişin“ ASC-nin sədri İlqar İbrahimov tərəfindən aldadıldığını bildirir.

Əli İbayevin mediaya etdiyi müraciətdə deyilir ki, İlqar İbrahimov tərəfindən aldadıldığı üçün 6 min manat ziyana düşüb. Belə ki, vətəndaş işləmək üçün ASC-yə müraciət etdikdə, sədr İlqar İbrahimov ona xarab bir avtobusu göstərərək deyir ki, bu maşını təmir edib marşrutda işə başlasın və bu zaman ona dəstək veriləcəyini də bildirib. ASC sədrinin sözlərinə inanan Əli İbayev avtobusun əsaslı təmirinə 6 min manat xərcləyir. Daha sonra Əli İbayev Lənkəran-Liman marşrut xəttində işə başlayır. Qeyri-rəsmi şərtə görə, Əli İbayev gündəlik plan, yəni 42 manat ödəyib. Razılaşmaya əsasən sürücüyə aylıq 280 manat da maaş verilib:
“Hər maaşdan sədr üçün 14 manat götürülürdü. Bir müddətdən sonra İlqar İbrahimov məni yanına çağıraraq gündəlik plandan əlavə 10 manat verməyimi istədi. Bunun hansı səbəbdən verməli olduğunu soruşanda məni xəttə buraxmayacağını dedi. Ona 6 min manat xərc çəkdiyimi xatırladanda isə bildirdi ki, avtobusa vurduğum rəngi qaşı apar deməklə yanaşı nə iş görduyumu soruşaraq lağ-lağı cavab verdi. Və mənim işə buraxılmamağımı tapşırdı. Məndən sonra bu idarədə “qanun mənəm, bir sözumu iki eləyəni işdən qovaram, heç kəs də mənə heç nə edə bilməz“ deyib. Mənə maşını təmir elətdirəndə demişdi ki, “avtobus müəssisənindi, onu təmir elə, biz də səni nəzərə alarıq“. Plan zamanı daha az verərsən deyə söz vermişdi. Amma planda nəinki məni nəzərə almadı, hələ gündəlik 10 manat da əlavə istədi. Bunu vermədim deyə, məni işə buraxmadı. Sonra isə mənim güya işə gəlməməyimi əsaslanıb xidməti uyğunsuzluqla işdən çıxaracağını, bunu etməməyi üçün ərizəmlə işdən çıxmağımı istəyərək, təmirə qoyduğum pulu qaytaracağını dedi. Ərizəmi yazandan sonra “sənə heç nə vermirəm, nə edə bilirsən elə, mənə heç kəs heç nə bilməz dedi“. İlqar İbrahimov burada imperiya qurub, onun xəbəri olmadan orada “quş“ da uça bilməz. Bütün vəzifələrə də yaxınlarını təyin edib“.
Şikayətçi daha sonra “Lənkəran Sərnişin“ ASC-də əmək hüquqlarının pozulması faktlarından və  müəssisənin gəlirlərinin əksər hissəsinin rəsmiləşdirilmədiyi barədə məlumat verir…
Qarşı tərəfin də mövqeyini işıqlandırmağa hazırıq.
aztoday.org