Evlərdən şirniyyat oğurlayan ayının axtarışlarına başlanıldı

Yaponiyanın şimal-şərqində yerləşən Şizukuişi şəhərində son iki həftə ərzində baş verən 14 oğurluq hadisəsinin arxasında eyni ayının dayandığı ehtimal olunur. Evlərə pəncərələrdən daxil olan, soyuducuları boşaldan və mağazalardan şirniyyat oğurlayan heyvanın tapılması üçün geniş axtarışlara başlanılıb.

“Qafqazinfo”nun məlumatına görə, 87 yaşlı şəhər sakini Mitsuo Matsubara axşam saatlarında mətbəxdən gələn səsləri yoxlamaq üçün içəri girərkən gözlənilməz mənzərə ilə qarşılaşıb.
O, soyuducunu açaraq ərzaqları ətrafa səpələyən iri Asiya qara ayısını görüb. Matsubaranın həyat yoldaşı dərhal polisə məlumat verib.
Hadisədən sonra şəhərin beş müxtəlif məhəlləsində oxşar basqınların qeydə alınması sakinlər arasında narahatlığı artırıb.
Hakimiyyət orqanları oğurluqların xüsusiyyətlərini nəzərə alaraq, bütün hadisələrin eyni ayı tərəfindən törədildiyini düşünür. Məlumata görə, heyvan xüsusilə şirin qidalara maraq göstərir. O, bir şirniyyat mağazasından müxtəlif desertlər oğurlayıb, həmçinin bir evə beş dəfə girərək, peçenye, konfet və ənənəvi şirniyyatları aparıb.
Ayının fermalardan birində mal-qara yeminə hücum etdiyi, hətta gecə saatlarında təsərrüfatın qapısını açmağa çalışdığı da bildirilib.
Ayının eyni ərazilərə dəfələrlə qayıtması qeyri-adi hal kimi qiymətləndirilir. Hazırda bölgədə qəfəs tələləri və elektrik çəpərləri quraşdırılıb, patrul qrupları isə sakinləri ehtiyatlı olmağa çağırır.
Şəhər sakinləri də öz təhlükəsizlik tədbirlərini görür. Bəziləri ayıları uzaqlaşdırmaq üçün evlərinin giriş hissələrinə acı xardal qarışıqları sürür. Bir sakin isə evə qayıdarkən ayının içəri girməsinin qarşısını almaq üçün qapını təxminən yarım dəqiqə güclə bağlı saxlaya bildiyini deyib.