Sərdar Cəlaloğlu qəza törətdi- "50 manat pul verib...”- ÖZƏL

Azərbaycan Demokrat Partiyasının sədri Sərdar Cəlaloğlu avtoqəza törədib.

Hadisə martın 15-də, səhər saatlarında Rəşid Behbudov küçəsində baş verib. İddia olunur ki, partiya sədri mopedi vurub.

Bu barədə mopedin sürücüsü Hüseyn Tanrıverdiyev Musavat.com-a məlumat verib.
Onun sözlərinə görə, S.Cəlaloğlu ona 50 manat pul verərək hadisə yerindən sürətlə uzaqlaşıb:

 “Rəşid Behbudov küçəsindən üzü “28 May” tərəfə qalxırdım. Orada işıqfor yandı. Mən 3-cü xətdən 2-ci xəttə keçdim. O da birinci xətdən gəlirdi. Mən sola döndüyüm məqamda o, məni vurdu. Sürətlə səki daşlarına dəydim, yıxıldım yerə. Ondan sonra insanlar ətrafıma yığışdı. Sərdar müəllim avtomobilini qabaqda saxlayıb yanıma gəldi, sadəcə “yaxşısan” filan deyib, maşınına tərəf getdi. Arxasınca gedib dedim ki, köməklik edin. Mənə qayıdıb dedi ki, sən avtomobilimi vurmusan. Dedim ki, axı motosikletlə necə o böyüklükdə maşını vura bilərəm. Çıxarıb mənə 50 manat pul verdi. Həmin vaxt motosikletə baxmamışdım, sonradan baxanda gördüm ki, xərci 220 manat civarında edir. Qayıdıb təzədən söhbət etmək istəyəndə gördüm ki, yoxdur. Sürüb getmişdi. Sonradan polislər gəldi. Dedilər, şikayətçisənmi, həmin vaxt üçün bunu düşünəcək vəziyyətdə deyildim. Dedim ki, özü ilə danışmışam. Düşünürdüm ki, sonradan maraqlanar. Polislər dedi ki, nəsə bir şikayətin olsa, Nəsimi rayon Polis İdarəsinə yaxınlaşarsan. Motosikleti ustaya göstərmdim, usta dedi ki, 250 manata yaxın xərci var. Lap Sərdar müəllim də maraqlana bilər. Kiminsə mənə artıq pulu lazım deyil. Ailəmi öz zəhmətimlə dolandırıram. İndi də motosikleti düzəltdirməyə imkanım yoxdur. Xahiş edirəm ki, Sərdar müəllim mənə kömək etsin. Sadəcə özü ilə əlaqə saxlamaq imkanım olmadığı üçün sizə üz tutdum”.
Obyektivliyi qorumaq üçün S. Cəlaloğlunun özü ilə əlaqə saxladıq. Partiya sədri qəzada heç bir günahının olmadığını söylədi və hətta dəyən ziyanı artıqlaması ilə ödədiyini qeyd etdi: “Hara istəyirsə müraciət etsin”.