Kərə yağı niyə qəhətə çəkilib? – “6 il öncə saxta variantlar gəlirdi”

“Bazarda xaotik vəziyyətin yaranması istehsalın yetərincə olmaması ilə bağlıdır. Azərbaycan nəinki özünü təmin edə biləcək, hətta tələbatının 5 faizə qədərini ödəyə biləcək qədər kərə yağı istehsal edə bilmir”.

Yenilik.az xəbər verir ki, bu sözləri “Yeni Sabah”a aqrar məsələlər üzrə ekspert Vahid Məhərrəmov deyib.
Onun sözlərinə görə, Azərbaycanda kərə yağının əsas xammalı olan südün məhsuldarlığı xeyli aşağıdır:
“Bazarda xaotik vəziyyətin yaranması istehsalın yetərincə olmaması ilə bağlıdır. Azərbaycan nəinki özünü təmin edə biləcək, hətta tələbatının 5 faizə qədərini ödəyə biləcək qədər kərə yağı istehsal edə bilmir.
Statistik istehsal rəqəmləri digər ölkələrdən gətirilən yağın yenidən qablaşdırılaraq, daxili istehsal kimi təqdim edilməsini göstərir. Çünki 1 kiloqram kərə yağını əldə etmək üçün 24 litr təzə inək südündən istifadə edilməlidir. Azərbaycanda isə südün litrinin qiyməti 1 manatdan yüksəkdir. Bütün xərcləri hesablayanda 30 manatın üzərində olur. Belə bir yağı heç bir vətəndaş almayacaq.
Açıq-aşkar istehsal problemi var. Çox az həcmdə süd istehsal edilir. Tələbatdan 2 dəfə az. Tələbat 4.4 milyon ton olmalıdır. Azərbaycanda adambaşına 405 kiloqram yağ norması düşür. Əgər daxili tələbatın heç olmasa 50-60 faizini istehsal etmək istəyiriksə, hər inəkdən alınan südü 3 dəfə artırlamıyıq.
Hazırda 1 inəkdən illik 1.7 ton litr süd alırıq, bunu 4.4 tona qaldırmalıyıq. Normal ölkələrdə bu göstərici 7-8 tondur. Görün bizdə məhsuldarlıq nə dərəcədə aşağıdır. Bunun səbəbi isə Azərbaycanın yetərində yem və ot istehsal edə bilməməsidir”.
Azad İstehlakçılar Birliyinin sədri Eyyub Hüseynov isə qeyd edib ki, məhəlli marketlərdə müxtəlif adlarla satılan kərə yağlarının tərkibində süd turşuları var:
“Bu məsələni 3 il öncə ilk dəfə mən səsləndirmişəm. Ara marketlərində satılan “nənəmin yağı”, “nənəmin əlləri” kimi adlarda olan yağları ekspertiza aparsaq, laboratoriya tərkibi müəyyən edə bilmir. Çünki tərkibində süd turşuları var. Laboratoriya isə süd turşularını tapır. Bu cür saxta yağların kərə yağı adı altında satılması davam edir. Lakin ciddi marketlərdə, marketlər şəbəkəsində belə yağlar olmur. Ölkəmizdə bir çox ölkələrdən, Almaniyadan, Fransadan, Yeni Zellandiyadan, Belarusdan yağlar idxal olunur.
Normal yağlar AQTA-nın nəzarəti altında olur və ciddi marketlər şəbəkəsində satılır. Məsələn, Yeni Zelandiya yağları ilə bağlı mənə illər boyu çoxsaylı şikayətlər gəlirdi. Əhali inanmırdı ki, Yeni Zelandiya kimi uzaq ölkədən ölkəmizə yağ gəlib çıxar.
6 il öncə bəzi yağların saxta variantları gəlirdi. Əhaliyə müraciət edirəm, “nənəmin yağı”, “kənd yağı” adı altında satılan yağlara aldanmasınlar”.