İqtisadçı bu qurumu tənqid etdi

Cənubi Qafqaz ölkələri arasında dövlət sektorunda çalışan muzdlu işçilərin payının ən yüksək həddi Azərbaycandadır. Belə ki, ölkə üzrə muzdlu işçilərin yarıdan çoxu dövlət mülkiyyətinin payına düşür.

Tribunainfo.az xəbər verir ki, bu məlumatı iqtisadçı Samir Əliyev paylaşıb. O bildirib ki,  bura dövlət büdcəsindən maliyyələşən təşkilatlarda və dövlət şirkətlərində işləyənlər daxildir:

“Halbuki qonşu Ermənistanda bütün muzdlu işçilərin 1/3-i, Gürcüstanda isə 1/4-i dövlət sektorunda çalışır. Son illər Azərbaycan və Ermənistanda dövlət sektorunun payının azalması, Gürcüstanda isə artması tendensiyası müşahidə edilir. Məsələn, 2018-2023-cü illərdə dövlət sektorunun payı Azərbaycanda 57%-dən 51,7%-ə, Ermənistanda 35,3%-dən 29%-ə (2024-cü ildə hətta 27,9% olub) düşdüyü halda Gürcüstanda 23.1%-dən 24%-ə yüksəlib.

Ümumiyyətlə götürdükdə, muzdlu işçilərin böyük hissəsinin dövlət sektorunda olması o deməkdir ki, dövlət iqtisadiyyatda dominant rola malikdir, dövlət büdcəsinin sosial yükü yüksəkdir, iqtisadiyyatda liberallaşma aşağı səviyyədir, rəqabət çox aşağıdır və özəl sektor zəif inkişaf edib. Bu hal uzunmüddətli perspektivdə iqtisadi inkişaf üçün dayanıqlı hesab olunmur, çünki innovasiya və rəqabətlilik daha çox özəl sektorda yaranır.

Azərbaycanda dövlət sektorunda çalışanların payının özəl sektordan çox olmasının əsas səbəbi dövlətin qolunu çırmalayıb bizneslə məşğul olmasıdır. Xırda istisnalarla ölkənin neft-qaz, kommunal, nəqliyyat sektoru dövlətin idarəetməsindədir. Eyni zamanda özəl sektorda ağarmanın tam olmaması da səbəblərdən biridir”.