“Uşağa tərbiyə vermək də əmək fəaliyyətidir” – Pensiyaya dair yeni təklif

“Doğrudan da, indiki dövrdə 5 və daha çox uşağı saxlamaq çox çətindir. Uşaqpulu verilməli və məbləği artırılmalıdır. Təbii ki, belə anaların vaxtından əvvəl pensiyaya çıxması da gözəl təşəbbüsdür”.

Bu sözləri "Yeni Sabah"a hüquq müdafiəçisi Novella Cəfəroğlu bildirib.
O, çoxuşaqlı analara bir sıra imtiyazların verilməsinin zəruriliyini diqqətə çatdırıb:
“Çoxuşaqlı ailələrə, analara uşaqların böyüdüyü müddət ərzində də diqqət etmək lazımdır. Doğrudan da, indiki dövrdə 5 və daha çox uşağı saxlamaq çox çətindir. Uşaqpulu verilməli və məbləği artırılmalıdır. Təbii ki, belə anaların vaxtın öncə pensiyaya çıxması da gözəl təşəbbüsdür.
Əgər qadın 5 uşaq böyüdür, ona tərbiyə verir, saxlayırsa, ona çoxlu imtiyazlar verilməlidir. Belə xanımların, adətən, əmək fəaliyyətində ləngimələr və fasilələr olur. Yaxud uşaqlarının çox olması ucbatından qadın işləyə bilmir.
Ümumiyyətlə, "əmək fəaliyyəti" ifadəsi mənə çox pis edir. Həmin analar üçün əmək fəaliyyəti elə uşaqa verdiyi təlim-tərbiyədir. Ona görə də bu fəaəliyyət uyğunlaşdırılmalıdır. Uşaqları saxlamaq da bir iş fəaliyyətidir. Bunların hamısı diqqətə alınmalıdır”.
Milli Məclisin Əmək və sosial siyasət komitəsinin sədr müavini Elşad Musayev isə təklif edib ki, “çoxuşaqlılıq” anlayışı 3 uşaqdan başlasın:
“Çoxuşaqlı qadınların pensiya yaşı ilə bağlı müəyyən müzakirələr gedir. Hazırda çoxuşaqlılıq dedikdə 5 və daha çox uşağın olması nəzərdə tutulur. Bu mövzuda müxtəlif təkliflər və müzakirələr var.
Məncə, çoxuşaqlılıq anlayışı 3 uşaqdan başlamalıdır. Hazırda ayrı-ayrı təkliflər var, müzakirələr gedir. Azərbaycan sosial dövlətdir və düşünürəm ki, bir müddət sonra bu kimi mövzular daha ciddi müzakirə olunacaq. Fürsət yarandıqca müavinətlərin sayını və miqdarını artırmalıyıq.
Təbii ki, çoxuşaqlı qadınların vaxtından öncə pensiyaya çıxması məsələsi daha çox müzakirə olunur. Məsələn, elə qadınlar var ki, işləyib və yetərincə pensiya kapitalı var. Elələri də var ki, ümumiyyətlə, pensiya kapitalı yoxdur. Həm mənim, həm də Əmək və sosial siyasət komitəsi mövqeyi belədir: məsələlərə vətəndaşlarımızın sosial müdafiəsi baxımından yanaşılsın”.
Xatırladaq ki, bundan əvvəl Milli Məclis üzvü Vaqar Bayramov 5 və 5-dən çox uşaq sahibi olan qadınların pensiya yaşının azaldılması və pensiya məğbləğinin fəqrləndirilməsini təklif edib.