“İrşad Elektroniks”ə 8 cərimə protokolu yazıldı… nə qədər cərimələnəcək?

İnzibati Xətalar Məcəlləsini pozduğuna görə dəfələrlə cərimələnən “İrşad Elektroniks”lə bağlı növbəti dəfə cərimə protokolu imzalanıb. Mağazalar şəbəkəsi ilə bağlı imzalanan protokol sayı 8-dir.

Tribunainfo.az xəbər verir ki, imzalanan 7 protokol İnibati Xətalar Məcəlləsinin gömrük qaydaları əleyhinə olan 493-cü maddəsini pozmağa görədir. Maddənin tələbinə görə, gömrük bəyannaməsinin və onunla birgə təqdim edilməli olan sənədlərin Azərbaycan Respublikasının Gömrük Məcəlləsində müəyyən edilmiş müddətdə müvafiq icra hakimiyyəti orqanına təqdim edilməməsinə görə, fiziki şəxslər əlli manat məbləğində, vəzifəli şəxslər yüz əlli manat məbləğində, hüquqi şəxslər üç yüz manat məbləğində cərimə edilir.
“İrşad Elektroniks”lə bağlı 7 işə Nəsimi rayon Məhkəməsində işlərə 15-16 aprel tarixlərində hakimlər Solmaz Mustafayeva, Elməddin Hüseynov və Anar İbadzadənin sədrliyi ilə baxılacaq.
Tələbi pozulan digər iş isə İXM-nin idarəçilik qaydaları əleyhinə olan 528.1-ci maddəsidir. Tələbi pozulan maddəyə əsasən, icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsinə və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsinə görə, fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir.
Bu protokolla bağlı işə isə 14 aprel tarixində Gəncə Apellyasiya Məhkəməsində hakim Müşfiq Məmmədovun sədrliyi ilə baxılacaq.
Qeyd edək ki, “İrşad Elektroniks”in İdarə Heyətinin sədri Aris Şıxəliyevdir.
Qarşı tərəfi dinləməyə hazırıq.