Vergidə 10 illik gecikmə: Kiçik sahibkarları kim müdafiə edəcək?

Azərbaycanda 3 pilləli devalvasiyadan həmən sonra dəfələrlə ictimai çıxışlarımızda təklif etmişdik ki, kiçik-orta sahibkarlar, sadələşdirilmiş vergi ödəyiciləri üçün illik 200 min manatlıq limit artırılsın, çünki məntiqsizlik var, 200 min limiti keçənlərin həmən 18% ƏDV-yə cəlb edilməsi doğru deyil, limit çox kiçikdir.

Tribunainfo.az xəbər verir ki, bu barədə danışan iqtisadçı Natiq Cəfərlinin sözlərinə görə, Maliyyə Nazirliyi elan edib ki, nəhayət, bu məsələyə baxılır və 200 minlik limit artırılacaq:
“10 ildən sonra yenə biz deyənə gəlirlər, amma nəticədə 10 il itirmiş oluruq. Məncə, limit, ən azı, 500 min manat olmalıdır, amma yaxşı olar ki, birdəfəlik 1 mln. manata qaldırılsın, vergi dərəcəsi də Bakı və Abşeron üçün 4%, regionlar üçün isə 2% müəyyənləşsin. Əminəm ki, bu kiçik-orta sahibkarlar üçün çox ciddi dəstək və stimul olacaq. Maliyyə Nazirliyinin bu təşəbbüsünü alqışlayıram.
Sadəcə, insanı düşündürən, yandıran odur ki, hökumət məntiqli görünən addımları çox gec atır. Məsələn, 2024-cü ilin yanvarında bəzi kateqoriyalara aid kiçik sahibkarlar üçün vergi dərəcəsini 20%-ə qaldırdılar – bəlkə də, 20 dəfə çağırış etdik ki, yanlışdır, etməyin, səhvdir, ciddi problemlər yaranacaq, amma, dinləmədilər, 2024-cü il ərzində, doğrudan da, ciddi problemlər yaşandı və 2025-ci ildə məcbur olub yenidən 5%-ə saldılar. Bir Allahın qulu məmur da çıxıb etiraf etmədi ki, bu absurd qərarı kim və nədən təklif etmişdi, sonra nə oldu ki, ləğv edildi – yaxşı, 2024-cü ildə bu mənasız qərara görə işini itirən, biznesini bağlayan kiçik sahibkarlara dəyən ziyanı kim ödəməlidir?!
Hörmətli qalstuklu müəllimlər, bir az çevik olun, təşəbbüskar olun, özünüz bilmədiyiniz məsələlərlə bağlı kənardan təkliflər ediləndə ciddiyə alın, belə olmaz, bu məmləkət, bu dövlət hamımızındır, sizin səriştəsizliyinizə görə insanlar niyə əziyyət çəkməlidirlər ki?!”.