Diqqət! Kartlardan bu saytlar vasitəsilə də oğurluq edilir

İkinci əl alış-veriş saytlarına elan yerləşdirərkən ehtiyatlı olun. Bu səhifə və saytlarda mal yerləşdirərkən qoyduğunuz nömrələrlə sizə zəng edərək kartınızdan pul oğurlaya bilərlər.

Bu barədə jurnalist Aytən Məmmədova başına gələnləri yazıb. O bildirib ki, elan yerləşdirən kimi ona şübhəli zənglər gəlməyə başlayıb:
“Bir müddət əvvəl köhnə divan-kreslonu satmaq üçün ikinci əl alış-veriş saytına elan yerləşdirdim. Üstündən heç 10 dəqiqə keçməmiş xarici nömrədən zəng gəldi. Bir qadın idi, dedi ki, mən almaq istəyirəm, orada kirayə verdiyim ev üçün maşın gəlib aparacaq, kart göndər, pulu ora köçürüm. Şəxsiyyət vəsiqəmi də istədi.
Bir neçə ay əvvəl bank kartları ilə bağlı problem belə yayğın deyildi deyə, ağlıma başqa fikir gəlmədi. Mən də şəxsiyyət vəsiqəmi göndərdim, kartın şəklini çəkib göndərdim. Kartın arxa hissəsinin fotosunu istəyəndə ayıldım. Dedim ki, yox, bu cür satmıram, sürücü gəlsin, 100 manatı özümə versin, aparsın…
Üstündən az qala, iki il keçib, bugünlərdə yenə WhatsApp-dan Rusiya nömrəsindən bir qadın zəng eləyib ki, siz mebel satırsınız. Şübhələndim. Heç nə demədim. Bu yenə başladı ki, mənə kart göndərərsiz, ora köçürərəm. Dedim ki, yox, nağd pula satıram. Halbuki, divan çoxdan satılıb.
Deyirəm, yox, burada kartla bağlı çox dələduzluq olur, ona görə heç kimə inanmıram. Nə qədər çalışdı ki, məni yola gətirsin, kartımı göndərim ona: “Biz həmişə kartla alış veriş edirik, burada heç vaxt belə problem olmur, siz nə danışırsınız, oradan qardaşlarım gəlib götürəcək…”
Başa düşəndə ki, yox, aldada bilməyəcək, əl çəkdi.
Demək istədiyim budur ki, bank kartından oğurluq edənlər alış-veriş saytlarını da güdürlər, oradakı nömrələri götürüb, tora salmağa çalışırlar”.
Nigar İxtiyarqızı