Boşanma uşaqların psixikasını bu cür pozur – Psixoloqdan ciddi XƏBƏRDARLIQ

Son illərdə boşanmaların sayı sürətlə artmaqda davam edir. Hətta mediatorlardan birinin sözlərinə görə, boşanmaq üçün 2 saatda bir müraciət edilir. Boşanmalar hər iki tərəflə yanaşı, uşaqlara da ciddi təsirlərini göstərir.

Bəs uşaqlar belə vəziyyətlərdə hansı problemlərlə üzləşir?

 
Məsələ ilə bağlı Tribunainfo.az-a açıqlama verən psixoloq Aytən Ələkbərova bildirib ki, boşanan ailələrdə uşaq psixologiyası ilə bağlı bir çox məqamlar olur. Hətta ailədə baş verməkdə olan hadisələrdə, boşanmaya doğru gedən addımlarda gərginlik, təşviş-düşüncə pozuntusu, hətta hallüsinasiyaların yaranmasına qədər gətirib çıxarır.
Psixoloqun sözlərinə görə, hər uşaq fərqli və fərdi düşünə bilər. Uşaq var ki, düşünür ki, valideynləri bu formada yaşamaqdansa, hərə öz həyatını yaşamalıdır.
Uşaqlarda yaranan travmalar Bir ömür boyu davam edir. Uşağın valideynlə duyğu bağları qırılmağa başlayır. Uşaqlar düşünür ki, “valideynləri bizi sevsəydi, yanımızda dalaşmazdı” . 12-13 yaşında uşaqlar artıq öz fikirlərini sərbəst şəkildə bildirirlər. Natamam ailələrdə yaranan problemlər ki, var, bu problemlər natamamlıq kompleksindən panik ataka, panik atakdan isə üzvi şəxsiyyət pozuntusuna, üzvi şəxsiyyət pozuntusuna bipolyar pozuntuya və sonunda qorxunc olacaq şizofreniya xəstəliyinə qədər gətirib çıxarır.
Bəzən olur ki, valideynlər ayrılır və qadağalar başlayır. Ana övladını atası ilə görüşməyə icazə vermir. Müəyyən müddətdən sonra ata ilə uşaq arasında duyğu bağları itir. Eyni zamanda bir-birinə toxunuşlar itdikcə, bir müddət sonra gözləri valideyni axtararkən “arxamca gəldi, sanki məni izləyir” düşüncəsilə bir də görürük ki, uşaqda hallüsinasiya pozuntuları başlayıb. Yaranan bu durumlar uşaqlarda gələcəkdə boğazında tıxanma, yeməkdən kəsilmə, düşüncə pozuntuları onları idarə etməyə başlayacaq. İdarə etdikcə, baş verən müəyyən məqamlar var ki, qida borusunda əzələ yığılması xəstəliyinə gətirib çıxara bilər. Əzələ yığılması adi bir stəkan suyun belə, içilməsini həyata keçirə bilmir. Bu zaman cərrahi müdaxilə ilə xəstə bir müddətdən sonra yemək yeməyə, su içməyə başlayır. Görün, hansı məqamlara gətirib çıxarır ki, hətta onkologiyada əməliyyata belə salırlar ki, boğazda şiş yaranıb. Bunların hamısı valideynlərin yaratdığı stressdən qaynaqlanır.