McDonald’s-dan qalmaqallı “halal” açıqlaması: Bəs bu günə qədər bizə nə yediriblər?

Dünyaca məşhur restoranlar şəbəkəsi olan “McDonald’s Azərbaycan”ın dünən yaydığı açıqlama narazılıq yaratdı. Şəbəkə rəsmisi açıqlqmasında bildirdi ki, artıq Azərbaycandakı restoranlarında təqdim edilən bütün ət məhsulları 100 faiz halaldır.

Bu cümlə ilk baxışda müsbət qarşılanacaq bir xəbər kimi görünə bilər. Amma diqqət edərkən suallar meydana çıxır. Bəs indiyədək necə olub? Məgər bu günə qədər təqdim edilən ət məhsulları tam halal olmayıb? Bu halda, illərlə bu restoranlara etibar edən inanclı müştərilərə nə yedizdirilib?
Bu açıqlamadan aydın olur ki, bu günə qədər sözügedən şəbəkə restoranlarında yediyimiz ətlər halal olmayıb.
Tribunainfo.az xəbər verir ki, McDonald’s illərdir “halal” keyfiyyətinə uyğun məhsullar təqdim etdiyini bildirirdi. İndi isə “artıq 100% halal” deməklə, dolayısı ilə etiraf edir ki, əvvəlki dövrlərdə bu məsələdə tam təminat yox idi. Yəni minlərlə insan halal adı ilə bəlkə də qeyri-halal məhsul yeyib.
Bu, sadəcə istehlakçı etimadının sarsılması deyil, dini inanca qarşı açıq hörmətsizlik kimi də qiymətləndirilə bilər. Əgər illərlə təqdim olunan məhsullar halal deyildisə, bu aldadıcı reklam, dini həssaslığa qarşı məsuliyyətsizlik və istehlakçı hüquqlarının pozulmasıdır.
Suallar yaranır. Görəsən Qafqaz Müsəlmanları İdarəsi (QMİ) McDonald’s-a halal sertifikatı vermişdimi? Veribsə, hansı əsasla?, Azərbaycan Qida Təhlükəsizliyi Agentliyi (AQTA) illərdir fəaliyyət göstərən bu şəbəkənin halal uyğunluğunu hansı mexanizmlərlə yoxlanılıb?.
Əgər doğrudan da indiyədək təqdim edilən ətlər halal deyildisə, bu restoranlar şəbəkəsi hüquqi məsuliyyət daşımalıdır. Əgər təqdim edilən ətlər halal idisə, onda bu gün verilən “artıq 100% halal” açıqlamasının reklam manipulyasiyası olduğu aydın şəkildə bəyan edilməlidir.
Halal qidalanma sadəcə dini məsələ deyil, insan hüququ məsələsidir. İnsanlar yedikləri qidanın mənşəyini, kəsim şəraitini və saxlanma tərzini bilmək hüququna malikdir. McDonald’s bu açıqlaması ilə ictimai etimadı sarsıdıb və bu, sadəcə sosial şəbəkələrdə bir neçə gündə unudulacaq məsələ olmamalıdır.
İndi cavab vermək növbəsi məsul orqanlarda və həmçinin sözügedən restoranlar şəbəkəsindədir. İllərlə təqdim olunan ətlər tam halal idimi, yoxsa yox?