İcra başçısı özü özünü ifşa edib... - Foto

Zaman-zaman bəzi icra başçılarının atdığı addımlar cəmiyyətdə müzakirələrə səbəb olması ilə yanaşı, bəzən qıcıq da yaradır. Bəziləri özünü yaxşı işləyən məmur kimi təqdim etməyə çalışsa da, sonradan bunun heç belə olmadığını görmüşük.

Məsələn, Şəmkirin icra başçısı Alimpaşa Məmmədov “Ay Laçın” şeirini elə bağıraraq deyirdi ki, fikirləşirdik, bundan vətənpərvəri yoxdur. Amma sonra rüşvət və korrupsiyaya görə tutuldu...
“Qafqazinfo”nun məlumatına görə,  4 il əvvəl DTX icra başçılarına qarşı əməliyyat keçirdiyi ərəfədə Kürdəmirin icra başçısı Ceyhun Cəfərov rayonda iclas keçirib demişdi ki, “Əgər bu məsələlər kimdəsə varsa, tamamilə yığışdırılsın. 5 ay ərzində DTX tərəfindən icra başçıları həbs olunub. Mən istəməzdim bizim rayonumuzda da belə hallar baş versin”.
Qısa müddət sonra bu dəfə Baş Prokuror yanında Korrupsiyaya qarşı Mübarizə Baş İdarəsi Ceyhun Cəfərovu saxladı. Səbəb yenə eyni idi - rüşvət, korrupsiya, mənimsəmə...
İmişlinin sabiq icra başçısı Vilyam Hacıyevin də adını əlavə edib siyahını uzatmaq olar, amma mövzumuz tutulan rayon rəhbərləri deyil, onların əməlləridir.
Bir müddət əvvəl Qaxın icra başçısı Musa Şəkiliyev də vətəndaş qəbulu ilə bağlı gündəmə gəlmişdi. Rayon rəhbəri özü oturub ağacın kölgəsində, vətəndaşları isə sınıq-saxlaq stullarda günün altında saxlamışdı.
Özünü şah, müavinlərini vəzir hesab edən Musa bəy günün istisində insanların sağlamlığını heçə sayaraq, onlara vətəndaş kimi yox, qultək yanaşmışdı.
Belə təfəkkürdə olan bir məmurun təbii ki, rüşvət almadan, korrupsiyaya bulaşmadan işləməsinə heç kim inana bilməz. Demək olar ki, özlərini öz əməlləri ifşa edir.
Elə bunun nəticəsidi ki, Dövlət Təhlükəsizliyi Xidməti bu dəfə də Qax Rayon İcra Hakimiyyətinin başçısı Musa Şəkiliyevi saxlayıb. Barəsində korrupsiya və digər vəzifə cinayətləri ilə bağlı araşdırma aparılan 66 yaşlı məmur indi daha sərin yerdə DTX-nin inzibati binasındadır...