Abunəçilər “Azercell”i məhkəməyə verməyə hazırlaşır – Foto

“Azercell”in son aylarda tariflərə şişirdilmiş qiymətlər tətbiq etməsi, müştərilərə daha ucuz alternativlərin təqdim olunmaması narazılığı daha da artırıb. Bu səbəbdən şikayətçilər “Azercell”i məhkəməyə vermək qərarına gəliblər.

Tribunainfo.az xəbər verir ki, bu barədə “Azercell” abunəçisi Pikə xanım Feysbukda şikayət səhifəsində yazıb. O bildirib ki, fakturasız xəttdə fakturalı kimi ödəniş almaq haqsızlıdır:
“”Azercell”in aylıq icazə almadan minimum 2 manat balansdan çıxması hüquqi deyil. İstifadə etmədiyim internet, zəng üçün niyə pul ödəməliyəm? Müştəri xidmətləri ilə danışdım. Deyirəm, müştəridən xəbərsiz bunu etməyiniz birbaşa oğurluqdur. Müştəriyə təklif edib, onun icazəsini almalı və ya pulsuz alternativ təklif etməklisiniz. Cavab olaraq mənə deyir ki, sizdən icazə almaq məcburiyyətində deyilik. Deyir, pulsuz heç bir tarifimiz yoxdur.
Müştəri olaraq birləşib məhkəməyə versək, məncə, bu işə həll yolu tapa bilərik. Fakturasız xəttdə fakturalı kimi aylıq ödəniş ala bilməzlər”.
Şikayətlər bununla bitmir. Digər abunəçi Araz Məmmədov da bildirib ki, o hər ay istiifadə etmədiyi tarifə görə pul ödəməli olur:
“Mən aylıq 9 manat olan bir tarifə keçmişdim. Gördüm yaxşı deyil, indi başqa tarifə keçmək istəyirəm. Onu deaktiv edə bilmirəm. Balans vuran kimi də həmin tarif çıxacaq avtomatik. Deməli, belə çıxır ki, mən həm 9 manat verib bu tarifi yeniləməliyəm, sonra da digər istifadə etmək istədiyim tarifin pulunu vurub ona keçməliyəm. “Azercell” konkret olaraq deyir ki, qazandığını mənə ver, istifadə etdin-etmədin, sənə lazım oldu-olmadı, pulu səndən məcburi alacam”.
Qarşı tərəfi dinləməyə hazırıq.
Gülşən Rəsul