Deputat Trampın paylaşımından danışdı: “Azərbaycan xalqına bəxtəvərlik oxuyurlar ki, İlham Əliyev kimi prezidentləri var”

“Prezident İlham Əliyevin III Şuşa Qlobal Media Forumunda ABŞ Prezidenti Donald Tramp haqqında səsləndirdiyi fikirlər həqiqəti əks etdirir. Doğrudan da, Tramp kiçik münaqişə yaradıbsa da, bunu hansısa müharibəni dayandırmaq üçün edib. Buna görə də cənab Prezidentin fikirlərində böyük həqiqər var. Trampın ABŞ-də baş verən bir çox məsələlərlə bağlı atdığı addımlar Azərbaycanın da maraqlarına cavab verdiyinə görə cənab İlham Əliyev onun haqqında xoş sözlər dedi. Amerika kimi böyük bir dövlətin Prezidentinin öz sosial şəbəkəsində Azərbaycan Prezidentinin Forumdakı çıxışından videosunu paylaşması Azərbaycana və onun dövlət siyasətinə verilən dəyərdir. Bu, Donald Trampın Azərbaycanın haqq işinə, Qarabağın Azərbaycan olmasına verdiyi dəyərdir! Bu da təbii ki, Azərbaycan Prezidentinin qələbəsidir. Buna görə həqiqətən fəxr etdim”.

 
Bu sözləri Pravda.az-a açıqlamasında Milli Məclisin deputatı Razi Nurullayev deyib.
 
“Prezident İlham Əliyevin III Şuşa Qlobal Media Forumunda çıxışının bütövlükdə mətni böyük bir qələbədir. Başqa bir partiyanın sədri olsam da, müxalifəti təmsil etsəm də, mən də fəxr etdim, həqiqətən, çox sevindim. “Youtube”da Prezidentin Forumdan çıxışının ayrı-ayrı hissələri də paylaşılıb, şərhləri də oxudum. Bütün dünyadan yazılan şərhlərin əksəriyyəti pozitivdir. Azərbaycan xalqına bəxtəvərlik oxuyurlar ki, İlham Əliyev kimi prezidentləri var. Prezidentin sözləri necə ard-arda düzməsini, təmkinliyini izlədim. Müxtəlif dillərdə axıcı danışıq tərzini çox bəyəndim. Bir saat da danışsa, insan yorulmur, zövqlə dinləmək istəyir. Dünyada baş verən hadisələrin hamısını düzgün şəkildə qiymətləndirir. Qorxmadan, çəkinmədən beynəlxalq hüquq necə tələb edirsə, Azərbaycanın və qonşu ölkələrin milli maraqlarını dilə gətirir. İllər əvvəl dediyi fikirlərindən bir zərrə də geri çəkilməyib”, - o bildirib.