“Okuklu Holdinq” Azərbaycan vətəndaşlarının pulunu necə mənimsəyir?

Zaman-zaman Türkiyə-Azərbaycan münasibətlərinə zərbə vurmaq, iki qardaş ölkə arasında gərginlik yaratmaq cəhdlərinin arxasında təəssüflər olsun ki, türkiyəli iş adamları, sahibkarlar da yer alıb. Gununsesi.info Newcenter.az  -a istinadən xəbər verir ki, ikinci Qarabağ Müharibəsinə qədər olan dövrdə Ermənistanla əlaqələr quran, bu ölkəyə müxtəlif məhsullar ixrac edən kifayət qədər türkiyəli sahibkarlar olub. Təbii ki, türk qardaşlarımızın bu fəaliyyəti Azərbaycanda acı bir təəssüf doğurub.

Azərbaycanda özünə biznes qurub ölkədə nüfuzlu bir xarici investor kimi tanınan türk şirkətlərinin də bəzilərinin fəaliyyəti Ankara-Bakı arasında əlaqələrin inkişafından daha çox, bu əlaqələrə zərbə vurmağa, öz yarıtmaz, dələduzluq fəaliyyətləri ilə münasibətlərə kölgə salmağa xidmət edir. Necə ki, “Okuklu Holdinq” kimi.
Məlumat üçün qeyd edək ki, Türkiyənin “Okuklu Holdinq” şirkəti bir neçə ildir Azərbaycanda da fəaliyyət göstərir. Son zamanlar onların bəzi əməllərindən şikayətlər olunur. Rəhbərləri Yılmaz Okuklu bəzi işçiləri ilə əlbir olaraq Azərbaycan vətəndaşlarının pulunu mənimsəmək, onları aldatmaqla məşğul imiş. Bu o Yılmaz bəydir ki, Qarabağ qazilərindən ibarət Azərbaycan amputant futbol komandası Türkiyədə olarkən keçmiş daxili işlər naziri Süleyman Soylunun komandaya verdiyi avtobusun açarlarını mənimsəyərək sərhəddən keçirməyə qoymamışdı.
Vətəndaşımız Bəşirov Rövşən Azərbaycanda yerləşən “Okuklu Holdinq” şirkətinə məhsullar sifariş edib və bunun müqabilində şirkətin təmsilçisi Elşən Nəhmətova müəyyən miqdarda pul ödəyib. Vəd olunan vaxt yetişib. Lakin Rövşən Bəşirovun sifariş etdiyi mallar gətirilməyib. Hər dəfə əlaqə saxlayıb soruşanda müxtəlif səbəblər deyilib. Ancaq nəticədə pulu ödənmiş məhsullar ünvanına çatmayıb. Belə olan halda Rövşən Bəşirov “Okuklu Holdinq”in rəhbəri Yılmaz Okukluya müraciət edib, əhvalatı danışıb. O da bu məsələdən xəbərdar olduğunu, malın tez bir zamanda çatdırılacağını deyib. Amma yenə də nə mal çatdırılıb, nə də pulu qaytarılıb. Üç gün keçəndən sonra Rövşən Bəşirov yenidən Yılmaz Okukluya ilə əlaqə saxlayıb. Bu dəfə holdinq rəhbəri deyib ki, şirkət adından sövdələşmə aparan əməkdaşı işdən azad edib. Çünki müştəriləri aldadırmış. İndi maraqlı vəziyyət yaranıb. Yılmaz Okuklu deyir ki, işçim müştəriləri aldadır, amma heç bir tədbir görmür. İşdən çıxartmaqla məsələ həll olunmur. İşçin dələduzluq edibsə, müştəriləri aldadıbsa, onunla bərabər şirkət də məsuliyyət daşıyır. Cənab Okuklu özü bu fakt əsasında hüquq-mühafizə orqanlarına müraciət etməli, sifarişçilərə dəymiş ziyanı ödəməli idi. Yılmaz bəy isə çalışır ki, şikayətdə adı keçməsin. Bundan sonra da yaxasını kənara çəkib zərərçəkənlərə köməklik göstərmir. Deməli bu bir oyundur. Pulu alıb mənimsəyirlər. Sifarişçi malı istəyəndə də deyir işçim dələduz çıxıb, get şikayət et.
Yılmaz Okuklu bəy, Türkiyənin qanunları olduğu kimi, Azərbaycanın da qanunları var. Siz bizim ölkənin ərazisində pul qazanıb vətəndaşları aldadaraq axıra kimi rahat işləyə bilməzsiniz. Bir gün qanunun gücü bu fırıldağın üstünü açacaq. Rövşən Bəşirov deyir ki, “Okuklu Holdinq” Azərbaycanda işləməyə başlayandan onlarla bir neçə dəfə sövdələşmələri olub. Həmişə də vaxtında, istədikləri şəkildə pullarını ödəyib. Amma indi qarşı tərəfin bu cür hiyləsi ona maddi ziyandan savayı, mənəvi zərbə də vurur. Xüsusən də bunu qardaş ölkənin vətəndaşından görmək çox məyusedicidir.

Yılmaz Okuklu əlavə olaraq Azərbaycanda bina tikintisi, fermer təsərrüfatı ilə də məşğul olur, restoranları, mağazaları var. Buna baxmayaraq çörəyini yediyi ölkənin vətəndaşlarını aldatmaqla məşğuldur. İşçisi vətəndaşları aldadır, onun vasitəsilə pulları mənimsəyir. Sifarişçi pulunu istəyəndə deyir işçim dələduzdur, şikayət et, amma adımı çəkmə, sənə kömək edəcəm. Sonra şikayətdə adının yazılmadığından arxayın olub yaxasını kənara çəkir. Deyir, get kimə istəyirsən müraciət et. Şikayətçi Rövşən Bəşirov bildirir ki, bu barədə polisə müraciət edib. Lakin polisdə də ərazi aidiyyatına görə problem yaranıb. Abşeron polisindən işin Binəqədi polisinə aid olduğunu deyirlər. Binəqədi polisi də bunun əksini söyləyir. Üstəlik də polis bu məsələni mülki iş kimi qələmə verməyə çalışır. İndi ümid qalıb Daxili İşlər naziri cənab Vilayət Eyvazova və Baş prokuror cənab Kamran Əliyevə. Rövşən Bəşirov xahiş edir ki, bu məsələ nəzarətə götürülüb tam, obyektiv, hərtərəfli araşdırılması təmin edilsin.
Bu arada bir məqamı da qeyd etmək yerinə düşər ki, “Okuklu Holdinq”in adı xuliqanlıq, ictimai asayişi pozmda da hallanır. Hələ bir müddüət əvvəl “Okuklu Holdinq”in direktoru və müavininin xuliqanlıq zəminində adam döydüyü barədə məlumat yayılmışdı. Məlumatda bildirilirdi ki, hadisə Nərimanov rayonu Daş karxanası küçəsində baş verib. Şikayətçi 1973-cü il təvəllüdlü Azad Zeynalov 17-ci Polis Şöbəsinə müraciət edərək bildirib ki, “Okuklu İnşaat” MMC-nin direktoru, 1980-ci il təvəllüdlü Özkan Şam Rehman və onun qohumu, 1972-ci il təvəllüdlü Turan Yüzel Ferman onu xuliqanlıq zəminində döyüblər. Həmin vaxt Türkiyə vətəndaşları olan Özkan və Turan saxlanılmışdı.
Göründüyü kimi, “Okuklu Holdinq” sözün əsl mənasında Türkiyə-Azərbaycan əlaqələrinə dəstək vermək, bu əlaqələri inkişaf etdirmək, iqtisadi sahədə bağları möhkəmləndirmək əvəzinə öz yarıtmaz, dələduz fəaliyyəti ilə bu əlaqələrə kölgə salmaq, ona zərbə vurmağa çalışır. Hər halda şirkətdən olan şikayətlərin artması belə deyir. Ümid etmək olar ki, Azərbaycanın müvafiq qurumları Ankara-Bakı münasibətlərinə zərbə vurmağa çalışan “Okuklu Holdinq” barəsində müəyyən ölçü götürəcəklər.