Elmira Axundova dünən “ağsaqqalım” dediyi Ramiz Mehdiyevin bugünkü taleyinə münasibətini açıqladı

Azərbaycan siyasi elitasının səhnəsində qəribə səssizlik hökm sürür. Dünənə qədər Ramiz Mehdiyevin adını eşidəndə ayağa qalxan, onun qarşısında baş əyən, “Ramiz müəllim” kəlməsini müqəddəs bir söz kimi tələffüz edənlər, bu gün qəribə bir qorxu içindədirlər. Əksəriyyət danışmaq istəmir. Heç kim etiraf etmək istəmir ki, bir vaxtlar bu ölkənin ən qorxulu, ən nüfuzlu, ən toxunulmaz adamının qapısında saatlarla gözləyib.

Bu sükutun ən diqqətçəkən ünvanlarından biri isə sabiq deputat, eks-səfir Elmira Axundovadır.
Musavat.com-un əməkdaşı onunla əlaqə saxlayaraq, bu gün ev dustaqlığında olan Ramiz Mehdiyevlə bağlı fikrini öyrənməyə çalışıb. “Ramiz Mehdiyevin ən yaxın çevrəsinə daxil olan şəxs olmusunuz, onun həbsinə münasibətiniz necədir” sualına Elmira Axundova qısa və məzmunsuz cavab verib. “Təşəkkür edirəm, təşəkkür edirəm...” – və telefonu qapadıb.
Halbuki Elmira Axundova uzun illər boyu Ramiz Mehdiyevin ən sadiq ideoloji silahdaşı kimi çıxış edirdi. O, Mehdiyevin kitablarının təbliğatçısı, onun “ağsaqqal siyasətçi obrazının” yaradıcısı idi. Onun deputat mandatı da, səfir postu da Ramiz Mehdiyevin masasından keçmişdi. Axundova bir vaxtlar danos-məktublarında Mehdiyevə “mənim dostum və ağsaqqalım” deyə müraciət edir, 2018-ci ildə ona “Xalq yazıçısı” adını şəxsən təqdim etdiyinə görə fərəhlə danışırdı. Dünən “dostum”, “ağsaqqalım” dedikləri bu gün “şübhəli şəxs” statusundadır deyə ona münasibət də dəyişib. Bir vaxtlar donos-məktublarla öz ağsaqqalını tərifləyən və başqalarını ləkələyən biri indi danışmağa söz tapmır?

O məktub 2018-ci ilin payızında yazılmış, Ramiz Mehdiyevə sədaqət andı kimi təqdim olunan, amma əslində, bir çoxlarını hədəfə alan donos ruhlu yazı  Elmira Axundovanın kimliyini çoxdan açıb.
İndi isə vəziyyət fərqlidir. Ramiz Mehdiyev yıxılıb, onun köhnə dostları, sabiq müttəfiqləri, ideoloji tərəfdaşları sanki dillərini udublar. “Ramiz müəllimlə” bir kadrda görünməkdən, hətta adını çəkməkdən qorxurlar.
Bəli, Elmira Axundovanın bugünkü “təşəkkür” cavabı, əslində, bir etirafdır. Ramiz Mehdiyevin uzun illər ərzində yetişdirdiyi “sadiq çevrəsi” indi onu tək buraxmaqla, əslində, həm də onun özünün mahiyyətini üzə çıxarır. Görünür ki, bu, sadəcə qarşılıqlı fayda üzərində qurulmuş bir münasibətlər teatrıdır. Elmira Axundova isə bu teatrın ən tanınan aktrisasıdır.