Ramiz Mehdiyev kimləri ləkələyib, kimlərin qarşısını kəsib? - Keçmiş deputat adlar çəkdi

Xəbər verdiyimiz kimi, Prezident Administrasiyasının sabiq rəhbəri, Azərbaycan Milli Elmlər Akademiyasının keçmiş prezidenti, akademik Ramiz Mehdiyev barəsində DTX-nin Baş İstintaq İdarəsi tərəfindən cinayət işi başlanılıb. Səbail Rayon Məhkəməsi onun barəsində 4 aylıq ev dustaqlığı qətimkan tədbiri seçib.

AZXEBER.COM mövzu ilə bağlı sabiq deputat Etibar Əliyevdən müsahibə alıb. 

– Etibar müəllim, Ramiz Mehdiyev barəsində başlanmış cinayət işi ilə bağlı fikirləriniz necədir?

- Təbiətcə Ramiz Mehdiyev antimilli bir şəxsdir. Mən bu məsələ ilə bağlı hələ 2021-ci ildə – Ramiz Mehdiyev Azərbaycan Milli Elmlər Akademiyasının prezidenti olduğu dövrdə Milli Məclisdə çıxış etmişdim. O zaman da onun destruktiv əməllərinə diqqət çəkmişdim. Hətta mətbuatda "Ramiz Mehdiyev yetişmiş apensitdir” adlı məqaləm də dərc olunmuşdu. 

- Ramiz Mehdiyevin dövlət idarəçiliyində hansı mənfi əməlləri olub?

- Ramiz Mehdiyev Administrasiyada çalışdığı illərdə Heydər Əliyevin yaxın silahdaşlarını ləkələyib. O, istedadlı insanlara qarşı kompromatlar hazırlayır, onları sıradan çıxarmağa çalışırdı. Onun əsas məqsədi "91-lər”i sıradan çıxarmaq idi və buna müəyyən dərəcədə nail də oldu.

- Konkret adlar çəkə bilərsiniz?

- Əlbəttə. Məsələn, "91-lər”dən olan Şahlar Əsgərov, professor Zahid Qaralov, Əli Nağıyev və Asiya Manafova bu siyahıya daxildir. Onun çox güclü ideoloji aparatı vardı. Həmin aparat vasitəsilə bəzi insanların deputat seçilməsinə mane olurdu. Bu adam çox insana pislik edib, onların qarşısını kəsib.  

– Vaxtilə onun haqqında dediklərinizə görə sizə qarşı hücumlar olmuşdu. Bunu necə xatırlayırsınız?

- Bəli, o dövrdə mənim dediklərimə görə təhqirlərə məruz qalmışdım. Hətta Ramiz Mehdiyev özü də mənim haqqımda "Etibar Əliyev sifarişlə yazılar yazır” deyə fikir bildirmişdi. Amma mən hər zaman hesab etmişəm ki, dövlətlə dövlətçilik etmək olmaz. Dövlətin öz maraqları və təhlükəsizliyi var. Bu gün də bütün oyunların üstü açılır. 

— Ramiz Mehdiyevin hazırda 87 yaşı var. Sizcə onun yaşı istintaq zamanı nəzərə alınacaqmı?

- Onun yaşı bu məsələdə nəzərə alına bilməz. Dövlətə qarşı törədilən əməllər üçün güzəşt olmaz. Böyük ehtimalla, bu işləri tək görməyib. Onun ətrafında kimlərin olduğu mənə məlum deyil, amma istintaq orqanları çevrəsini çox yaxşı tanıyır. Mediada onun yaxın çevrəsində Eltun Məmmədovun adı çəkilib. Ola bilər, bəzi şəxslər bu məsələdə şəxsi qərəzlə hərəkət ediblər. Ancaq ümumilikdə, Ramiz Mehdiyev dövlətçilik üçün destruktiv fiqur olub. 

— Ramiz Mehdiyevin ailə üzvləri barədə də müəyyən iddialar səsləndirilir. Bu haqda nə deyə bilərsiniz?

- Onun qızı Kamilə Əliyeva BDU-nun Psixologiya kafedrasının dissertantı olub. Heç bir kafedra müdirinə ona yaradılan qədər şərait yaradılmayıb. Həmçinin həyat yoldaşı Mehdiyeva Qalina üçün də BDU-da xüsusi şərait təmin edilib. Bütün bunları araşdırmaq lazımdır.