"Birbank" kartlarından istifadə edənlərin nəzərinə: Faiz tutulacaq

Kapital Bank noyabrın 27-dən etibarən Birbank debet və taksit kartları, eləcə də  ko-brend kartları üzrə yeni komissiya tətbiq edəcəyini açıqlayıb. Bankın rəsmi məlumatına görə, şəxsi vəsaitlərin bankomatlarda nağdlaşdırılması və ya digər bank kartlarına köçürülməsi zamanı 1 faiz komissiya tutulacaq. Bu məbləğ minimum 1 manat (və ya 1 dollar, 1 avro) olacaq.

 
Bankın açıqlamasında qeyd olunur ki, bu dəyişiklik yalnız müvafiq SMS və ya Birbank tətbiqindən bildiriş almış müştərilərə aiddir. Kapital Bank bildirir ki, öz kartları arasında köçürmələr əvvəlki kimi limitsiz və komissiyasız qalacaq.
 
Lakin sosial şəbəkələrdə və istifadəçi qruplarında bu qərar müştərilər arasında ciddi narazılıq yaradıb. Bir çox istifadəçi yazır ki, bu addım müştəriləri itirməyə gətirib çıxaracaq. Bəziləri artıq Birbank kartlarını bağladıqlarını və digər banklara keçdiklərini bildiriblər.
 
Şərhlərdə qeyd olunur ki, bu dəyişiklik “ayrı-seçkilik” kimi qarşılanır, çünki yalnız bəzi müştərilərə tətbiq olunur. Digərləri isə hesab edir ki, bu, gələcəkdə bütün müştərilərə şamil ediləcək.
 
Bəzi istifadəçilər Birbank-ın cavablarını “şablon və qeyri-səmimi” adlandırıblar. Onlar qeyd edirlər ki, bankın “yalnız SMS alan müştərilərə şamil olunur” açıqlaması vəziyyəti izah etmir və daha çox çaşqınlıq yaradır.
 
Bank nümayəndələri isə bildiriblər ki, limitlər və şərtlər sistem tərəfindən avtomatik müəyyən edilir və hər müştəri üçün fərqli ola bilər.
 
İstifadəçilərin bir qismi bu qərarın müştəri loyallığını ciddi şəkildə azaldacağını, bəziləri isə “birkartın zibil qutusuna gedəcəyini” yazıblar.
 
Mütəxəssislər hesab edir ki, bu cür dəyişikliklər əvvəlcədən ictimaiyyətə daha aydın şəkildə izah edilməli və müştərilərin etimadı qorunmalıdır.