Texniki səhv adı altında dəhşətli cinayət: TƏBİB-lə bağlı HƏYƏCAN TƏBİLİ ÇALINDI

Deməli, qızımın işə düzəlməsi ilə bağlı sağlamlıq haqqında arayış alırıq. Və bir müddət keçdikdən sonra tam təsadüf nəticəsində məlum olur ki, TƏBİB-in sistemində qızımın xəstəlik tarixində belə bir arayış yerləşdirilib: “Yakob xəstəliyi zamanı demensiya” diaqnozu.

 
Qeyd edim ki, sonuncu dəfə bu xəstəlik 1998-ci ildə Böyük Britaniyada qeydə alınıb və heyvanmənşəli nadir və dəhşətli xəstəliklərdən biri kimi xarakterizə olunur. Yeri gəlmişkən, ingilislər belə bir xəstəliyin mövcudluğundan sonra məcbur olub cütdırnaqlı bütün heyvanları məhv ediblər. Nəticədə dövlətin iqtisadiyyatına külli miqdarda ziyan dəyib”.
 
Bu fikirləri Əməkdar jurnalist Fadil Paşayev öz sosial şəbəkə hesabında paylaşıb. Jurnalist bildirib ki, araşdırma aparıb və məlum olub ki, Azərbaycanda belə bir xəstəliyin qeydə alınması və açıq sistemə yerləşdirilməsi ilə bu ölkənin Ümumdünya Səhiyyə Təşkilatı qarşısında fövqəladə vəziyyət elan etmək kimi bir öhdəliyi var:
 
“Məsələ burasındadır ki, belə bir xəstəliyi ölü bir şəxsin beynindən götürülən hüceyrələri müayinə etdikdən sonra müəyyənləşdirmək olar. Hələ mənim övladımın keçirdiyi stressi demirəm. Vəziyyətlə bağlı iki ay bundan qabaq TƏBİB-in İctimaiyyətlə əlaqələr və marketinq departamentinin rəhbəri Zamira Adilova ilə əlaqə saxlanıldı. Bu şəxs açıq şəkildə bəyan etdi ki, məsələ TƏBİB-lik deyil, Səhiyyə Nazirliyinin səhvidir. Gör insan nə qədər laqeyddirsə, bu mövzu onun, yumşaq desək, heç vecinə də olmadı. Sonra Sumqayıt Tibb Mərkəzinə və mətbuat katibi Ramil Yaqub Zeynallıya müraciət etdik. Onlar bu yanlışlığını hərf səhvindən irəli gəldiyini və tez bir zamanda aradan qaldırılacağını desələr də, iki aydan çoxdur ki, məsələ öz həllini tapmır. Mən bu statusu yaza-yaza belə əllərim əsir, bir ölkə vətəndaşına, eləcə də Azərbaycanın maraqlarına bu qədər laqeyd yanaşan dövlət qurumlarına, ayrı-ayrı şəxslərə söz tapıb ifadə edə bilmirəm. Əslində yazaram, hələ o tərəfə də keçərəm. Sadəcə bilirəm ki, laqeyd münasibətin nəticəsində neçə-neçə cinayətlər işlənilir. Düzdür, bütün bunların cəzasını onsuz da gec-tez Uca Allah verir. Ancaq buna baxmayaraq, mən adını etiketlədiyim dövlət qurumları qarşısında bir həyəcan siqnalı çalıram. Xahiş edirəm, bir vətəndaş kimi qətiyyətlə təkid edirəm ki, bu kimi özbaşınalıqlar, texniki səhv adı altında dəhşətli cinayət ehtimalları araşdırılsın! Məsələni bir statusla ictimailəşdirməklə də kifayətlənməyəcəm, lazım gəldikdə Azərbaycan Respublikasının ali rəhbərliyinə müraciət etməklə haqlı şəkildə bir çox “kəllələr”in hüquqi müstəvidə cəzalanmasına nail olacağam. Əks təqdirdə cəzasızlığın olacağı Azərbaycanda yaşamaqdansa, ölümü arzulamaq çıxış yolu görünəcək mənim üçün. Ümid edirəm ki, Azərbaycan Respublikası Dövlət Təhlükəsizliyi Xidməti, Azərbaycan Respublikasının Baş Prokurorluğu bu faktla bağlı hüquqi müstəvidə ciddi addımlar atacaq. Hələlik bu qədər…” – jurnalist vurğulayıb.
 
Məsələ ilə bağlı TƏBİB-dən Konkret.az-ın sorğusuna cavab verilib:
 
“Paşazadə Fatimə Fadil qızının şəxsi kabinetində – my.gov.az portalında səhvən 2024-cü ildə “Kreystfeld–Yakob xəstəliyi zamanı demensiya” diaqnozunun qeyd olunması faktı qeydə alınıb.
 
Aparılan araşdırma zamanı müəyyən edilib ki, bu texniki yanlışlıq qeydiyyat mərhələsində baş verib. Belə ki, reyestrə təqdim edilən klinik diaqnoz Z02.1 kodu əvəzinə F02.1 kimi qeyd olunub.
 
Müvafiq şöbəyə və qeydiyyatçılara xəbərdarlıq edilib, gələcəkdə bu kimi halların təkrarlanmaması üçün əlavə nəzarət tədbirləri görülüb.
 
Bildiririk ki, vətəndaşın real klinik vəziyyəti ilə qeyd olunan diaqnoz arasında heç bir tibbi uyğunluq mövcud deyil və bu, sırf texniki səbəbdən baş vermiş qeyri-dəqiqlikdir.
 
18.10.2025-ci il tarixində sistemdə (e-tabib mobil tətbiqində) bu məlumatın düzəlişi üzrə müvafiq addımlar atılıb və my.gov.az platforması ilə sinxron yenilənmə işləri aparılır.
 
Yaxın günlərdə dəyişikliyin vətəndaşın my.gov.az platforması üzrə şəxsi kabinetində də əks olunması təmin ediləcəkdir”.