Fazil Mustafanın Şuraya etirazı, aparıcıya dəstəyi və yanlışı...

Millət vəkili Fazil Mustafa Audiovizual Şuranın “Gəl, danış!” proqramında aparıcının çıxışına görə (“Media haqqında” Qanunun 14.1.4-cü maddəsinin tələbləri pozulduğundan) yanvarın 14-ü saat 12:00-dan saat 15:00-dək Speys TV-nin yayımının 3 saatlıq dayandırılması barədə qərarnı “tamamilə yanlış” adlandırıb.

O yazıb ki, istedadını və cəfakeşliyini qiymətləndirdiyi Amil Xəlil ictimai əxlaqın qorunması istəqamətində cəsarətli fikir söyləyib, şəxsən kimisə hədəfə almayıb və tövsiyəsi də sağlam məntiqə dayanır:

“Cəmiyyətdə baş verən əxlaqi deqradasiyanı jurnalistin dilə gətirməsinə qarşı bu cür addımlar zərərlidir. O halda kim danışacaq bu neqativləri, kim insanlara doğru fikirləri aşılayacaq? Söyüş söyməyib, təhqir etməyib, mədəni üslubda fikir söyləyib, buna görə televiziyanın və jurnalistin hədəfə alınmasını yanlış hesab edirəm”.

Hər şeydən öncə Fazil Mustafaya bu aktual mövzuya dərhal reaksiyasına görə təşəkkür düşür. Həmçinin jurnalisti müdafiəsi də çox önəmlidir. Jurnalistin fikirlərini açıq ifadə etdiyinə görə işlədiyi kanalın yayımının müvəqqəti dayandırılması gərək ən son atılan addımlardan olsun, çünki ağır cəzadır və jurnalisti kollektivin də qınaq obyektinə çevirir.

Ancaq mütləq şəkildə əks tərəfdən də baxmağa ehtiyac var: Şura qərəzlimi qərar verib?

Aparıcının toxunduğu mövzunun nə qədər aktual olub-olmaması bir ayrı müzakirədir, məsələ problemin ifadə tərzidir.

Məsələn, Amil Xəlil “o şəxslərin 99 faizinin tələbələrdən ibarət olduğunu” iddia edir. Bu, cəsarət deyil, ifadənin doğru seçilməməsi, statistika deyil, öz mövqeyini müdafiə və təqdim etmək üçün manipulyasiyadır. Hansı sorğu mərkəzi belə bir sorğu keçirib və “onların” 99%-nin tələbə olduğunu təsdiqləyib? “Onlar” nə qədərdir və ümumilikdə “onların” tələbə kontingenti arasında faizi nə qədərdir? Məsələn, min nəfərdirsə, ümumi tələbələrin onlar neçə faizini təşkil edir? Nəzərə alaq ki, ölkəmizdə hazırda 250 min civarında tələbə var və onların əlbəttə ki, böyük əksəriyyəti Bakıdadır.

Niyə gənc qızlar-oğlanlar haqda “nəzarətsiz qalacaqları halda” “pis yola” düşəcəkləri təsəvvürü formalaşır?

Əksinə, valideyn övladını uşaqlıqdan doğru tərbiyə etməli və onun müəyyən yaşdan sonra doğru-dürüst və müstəqil yaşamına töhfə verməlidir.
Yəni problemə yanaşma və onun ifadə formasında daha dəqiq ifadələrdən istifadə etməkdə fayda var.
Aparıcının emosional ifadələrinin doğru olmadığı haqda tanınmış hüquqşünas və hüquq müdafiəçiləri mövqe ortaya qoymuşdular.

Fazil Mustafa da hüquqşünasdır və bəzi məsələlərdə dəstəyi həm də hüquqşünas kimi göstərsə, gənclərə yardımı daha böyük olar.