Dövlət Gömrük Komitəsi ilə bağlı Prezidentə MÜRACİƏT ETDİ: “Bu, korrupsiya meylli...”

Yazıçı Xeyrəddin Qoca Azərbaycan Dövlət Gömrük Komitəsində çalışan qızı Aygün Qoca ilə bağlı Prezident İlham Əliyevə müraciət edib.

"Yeni Sabah" müraciəti olduğu kimi təqdim edir:
"AZƏRBAYCAN RESPUBLİKASININ PREZİDENTİ CƏNAB İLHAM ƏLİYEVƏ.
Möhtərəm cənab Prezident!
Sözümü heç kimə çatdıra bilmədiyim üçün sosial mediada Sizə müraciət etməyə məcbur oldum.
Məni tanıyanlar bilirlər ki, ədalətsizliyə dözmürəm. Azərbaycan Dövlət Gömrük Komitəsində qızım Aygün Qocaya haqsızlıq edirlər, onun hüquqlarını pozurlar. O da sözünü heç kimə çatdıra bilmir, mən bu işə qarışmadığımdan, tək qalıb kömək istəyir.
Aygün Qoca 2014-cü ildən DGK-nın Gömrük tarifləri şöbəsində baş inspektor vəzifəsində çalışır. O, bu vəzifəyə ən aşağı vəzifədən pillə-pillə yüksəlmişdir Polkovnik-leytenantdır. Keçirilmiş attestasiya nəticəsində vəzifə dərəcəsi bir pillə endirilərək böyük inspektor təyin olunmuşdur. Buna etiraz etməmiş,10.12.2025-ci il tarixli əmrlə özünün razılığı olmadan və ixtisasına tamamilə zidd olan Katibliyin Qərarların İcrasına nəzarət şöbəsinə yerdəyişmə edilmişdir. Bu əmr qanunsuzdur! Çünki əmək funksiyasının dəyişdirilməsi AR Əmək Məcəlləsinin 56-cı maddəsinə əsasən, işçinin əmək funksiyası (ixtisası, peşəsi) yalnız tərəflərin qarşılıqlı razılığı ilə ola bilər. Qızımın "Qərarların icrasına nəzarət" (kargüzarlıq) sahəsinə keçirilməsi peşə fəaliyyətinin sonlandırılmasına bərabərdir. 
Məcburetmə və təzyiq: Kadrlar İdarəsinin rəisi Vüqar Əsgərov tərəfindən qızıma qarşı sözlü təzyiqlər göstərilmiş, subyektivcəsinə "yer yoxdur" bəhanəsi ilə əmək hüquqları pozulmuşdur. Bu yerdəyişmə qızım Aygün Qocanın iş keyfiyyəti ilə deyil, iş yerində "yer açmaq" və korrupsiya meylli maraqlarla bağlıdır. Bu isə  "Dövlət qulluqçularının etik davranış qaydaları haqqında" Qanunun tələblərinə ziddir. 
Yuxarıda qeyd olunanları və "Əmək Məcəlləsinin 294-cü, 296-cı maddələrini rəhbər tutularaq qızımın yerdəyişməsi haqqında 10.12.2025-ci il tarixli qanunsuz əmr ləğv edilməlidir. Qızım əvvəlki iş yerinə - Gömrük Siyasəti İdarəsinin Gömrük tarifləri şöbəsinə böyük inspektor vəzifəsinə bərpa olunmaq haqqında qərar çıxarılmasını istəyir. 
Aygün Qocaya qarşı edilən qanunsuz təzyiqlərə, peşə nüfuzuna vurulan zərərə və qanunsuz əmrə görə o, 1 ay öz hesabına məzuniyyət götürərək, işsiz və pulsuz qalmışdır. O, cavabdehdən maddİ və mənəvi ziyanın tutulmasını istəyir.
Aygün Qoca tək anadır, öhdəsində universitetin birinci kursunda oxuyan qızı var. 
Butün bunları nəzərə alaraq, Aygün Qocaya kömək etməyinizi xahiş edirəm.
DƏRİN HÖRMƏT VƏ EHTİRAMLA,
Xeyrəddin Qoca"