Nigar Fərhadı hansı cəza gözləyir? – AÇIQLAMA

Xəbər verdiyimiz kimi, məşhur aparıcı Nigar Fərhadın rəhbərlik etdiyi təhsil şirkəti ilə bağlı şikayətlər artır. “AİD Group”un bir neçə gün əvvəl fəaliyyətini dayandırması şikayətçiləri daha da narahat edir. Xaricdə təhsil üçün pul verən tələbə və valideynlər hazırda şirkətdən heç bir cavab ala bilmirlər.

 
Belə halda Nigar Fərhadı hansı cəza gözləyir?
 
Mövzu ilə bağlı Pravd​​​​a.az-a açıqlama verən vəkil, Azərbaycan İstehlakçılar Şurasının sədri Roman Qaraşovun sözlərinə görə, barəsində mediada məlumat yayılan hər bir şəxs təqsirsizlik prezumpsiyası hüququna malikdir və onun cinayət əməli törətməsi yalnız qanuni qüvvəyə minmiş məhkəmə hökmü ilə təsdiq oluna bilər.

O bildirib ki, vətəndaşlar xaricdə təhsil xidmətinin göstərilməsi məqsədilə şirkətə ödəniş etdiklərini, lakin müqavilə üzrə öhdəliklərin icra olunmadığını bildirirlərsə, müqavilə, ödəniş sənədləri, elektron yazışmalar, səs yazıları və digər sübutlarla birlikdə prokurorluğa, polis orqanlarına və ya digər aidiyyəti hüquq-mühafizə qurumlarına rəsmi ərizə ilə müraciət etməlidirlər: “Cinayət təqibinin başlanması üçün fiziki şəxslərin şikayət ərizələri ilə yanaşı, mediada yayılan məlumatlar da araşdırmaya əsas verən mənbələrdən biri ola bilər. Lakin əməldə cinayət tərkibinin olub-olmaması, konkret şəxslərin hadisədə rolu və məsuliyyətə cəlb edilib-edilməməsi yalnız səlahiyyətli istintaq orqanının araşdırması və məhkəmənin qərarı əsasında müəyyənləşdirilə bilər. Məsələnin mülki-hüquqi tərəfinə gəldikdə isə, müqavilə üzrə nəzərdə tutulan xidmət göstərilməyibsə, müştərilər ödənilmiş vəsaitin geri qaytarılması, dəymiş real zərərin və qanunla nəzərdə tutulan hallarda digər itkilərin əvəzinin ödənilməsi tələbi ilə məhkəməyə müraciət edə bilərlər. Şirkətin fəaliyyətini dayandırması, passiv vəziyyətə düşməsi və ya vergi borcunun mövcudluğu onun müqavilə öhdəliklərini avtomatik olaraq aradan qaldırmır. Araşdırma zamanı vəsaitlərin əvvəlcədən formalaşmış aldatma niyyəti və ya etibardan sui-istifadə yolu ilə əldə edildiyi sübuta yetirilərsə, əmələ cinayət-hüquqi qiymət verilə və təqsiri təsdiqlənən şəxslər barəsində müvafiq məsuliyyət tədbirləri tətbiq oluna bilər. Konkret cəzanın növü və həddi isə vurulmuş zərərin məbləğindən, zərərçəkmişlərin sayından, hər bir şəxsin hadisədəki rolundan və məhkəmənin yekun hüquqi qiymətləndirməsindən asılı olacaq”.