Kadırovun səhhəti pisləşdi, hakimiyyət davası başladı – Yerinə üç nəfər iddialıdır

Çeçenistan lideri Ramzan Kadırovun vəziyyətinin ağır olduğu və bunun Moskvanı Rusiyanın qeyri-sabit bölgəsində hakimiyyətin problemsiz ötürülməsini təmin etmək üçün bütün səyləri göstərməyə məcbur etdiyi bildirilir.

Bu barədə “The Times” məlumat yayıb.
Bildirilir ki, özünü Prezident “Putinin əsgəri” adlandıran Kadırov kəskin pankreatik nekroz və böyrək problemlərindən əziyyət çəkir, bu səbəbdən də ictimaiyyət qarşısına çıxışları getdikcə azalır. Çeçenistan lideri sonuncu dəfə bir həftədən çox əvvəl ictimaiyyət qarşısına çıxıb, o zaman da yorğun görünüb, əsa ilə yeriyib.
Keçən həftə xəbər verilmişdi ki, 2007-ci ildən hakimiyyətdə olan 49 yaşlı Ramzan Kadırov dekabrın 25-də Rusiya Prezidenti Vladimir Putinin sədrliyi ilə keçirilən iclasda iştirak etmək üçün Moskvada olarkən xəstəxanaya yerləşdirilib. Çeçenlərin lideri iclasda iştirak etməyib, Kremlin yayımladığı rəsmi fotolarda da görünməyib. Çeçenistan rəsmiləri, daha sonra isə Kadırovun özü bu məlumatları təkzib edib.
Çeçenistan liderinin özü də ötən ay dolayı yolla səhhətinin ağır olmasına eyham vurub:
“Əgər şayiələrə inansaq, qocalığa çatmayacağam. Düzü, qocalığa çatmaq da istəmirəm. Məni hamının sevdiyi və hörmət etdiyi vaxtda ölmək istəyirəm”.
Nəşr yazıb ki, Ramzan Kadırov məhkəməsiz edamlar və işgəncələr də daxil olmaqla, çoxsaylı insan haqları pozuntularında ittiham olunur: “Səhhəti kəskin şəkildə pisləşib, hazırda Çeçenistanda özəl klinikada dializ müalicəsi alır”.
Məlumata görə, varislik məsələsi Kadırov üçün həyati əhəmiyyət daşıyır, onun əsas marağı ailəsinin uzunmüddətli təhlükəsizliyini təmin etməkdir. Kreml üçün də bu məsələ vacibdir, çünki əsasən müsəlmanların yaşadığı Çeçenistan üzərində maksimal nəzarəti saxlamaq istəyir.
“Hesab olunur ki, Kadırovlar ailəsinin təxminən 100 üzvü Çeçenistan administrasiyasında müxtəlif vəzifələr tutur ki, bu da Rusiyadakı bütün məmurlar arasında ən yüksək göstəricidir. İkinci yerdə Putindir, rus jurnalistlərinin məlumatına görə, o, 26 qohumunu rəhbər vəzifələrə təyin edib”, - məqalədə deyilir.
Nəşrin fikrincə, Ramzan Kadırov varis kimi üçüncü oğlu, 18 yaşlı Adamı hazırlayır. O, həm xarici görünüşü, həm də davranışları ilə atasına çox bənzəyir və son aylarda Təhlükəsizlik Şurasının katibi vəzifəsi də daxil olmaqla, bir çox postlara yiyələnib.
Digər oğlu Əhməd Kadırov da Çeçenistan administrasiyasında ən çox vəzifə daşıyan şəxslərdən biridir. Artıq idman naziri və regional gənclər məsələləri üzrə nazir olan Əhməd bu ay Çeçenistanın baş nazirinin müavini təyin edilib.
Qafqaz üzrə ekspert Harold Çembers bildirib ki, ailə üzvlərinin vəzifələrə gətirilməsi Kadırov administrasiyasına Rusiya xüsusi xidmət orqanlarından artan təhdidlərə cavabdır, onlar Çeçenistandakı rejimi daha itaətkar rəhbərlə əvəzləmək istəyirlər:
“Məhz bu amil, eləcə də səhhətinin pis olması Kadırovu oğullarının daha yüksək siyasi vəzifələrə sürətlə irəli çəkilməsinə vadar edir”.
Məlumata görə, Moskvada Kadırovun mümkün varisi kimi çeçen hərbi komandir Apti Alaudinov və ya sərt xətti ilə tanınan Çeçenistan parlamentinin deputatı Adam Dəlimxanov üstün tutulur.