"Zəng ediblər ki, yazma, uşağına nəsə edərlər"

"Heç kəs toy edib şadlıq sarayından çek almır. Niyə? Evinizdə çörək bişirib satsanız, vergi qapınızı kəsdirəcək ki, cərimə ödə, çörəyi satanda çek verməmisiniz. Necə olur ki, 50-500 min arası şadlıq sarayına toya pul ödənilir və heç kəs nə çek tələb edir, nə də çek verir?" Bu sözləri müğənni Nura Suri sosial media hesabında yazıb.

 
O, növbəti dəfə restoran sistemində olan nəzarətsizliyə diqqət çəkib:
 
"Necə olur ki, sənədlə həmin o möhtəşəm şadlıq sarayları adi adamların adına olur və heç kəs maraqlanmır, səndə bu pul haradandır? Banka ay ərzində 10 mindən artıq pul qoyan kimi haqq-hesab soruşurlar adamlardan.
 
Şadlıq saraylarını işlədənlər isə fotoqrafın, dekor şirkətinin, tort hazırlayanın puluna şərik olur, monopoliya yaradır, gözü doymur. İnsanların qazancının qarşısını alırsınız ki, 5-3 manat qazanan da qazana bilməsin.
 
İnsanların çörəyinə bais olub mafiya qurublar. Hamıdan faiz alırlar. Bəsdirin də!
 
O gün status yazmışam, hamı paylaşıb: "Halal olsun, səsimiz oldunuz" yazır. Niyə oturub gözləyirsiniz ki, mən yazım? Niyə özünüz danışmırsınız? Niyə toy yiyəsi şadlıq saraylarının şərtləri ilə razılaşır? Suallar çoxdur, hamı da hər şeyi görür, bilir və susur.
 
Mən də doğruları yazanda, bəzi gerizəkalılar özlərinə əl qatırlar ki, "Nuranın başı gedib, hər şeyə fikir bildirir, dəli olub" və s. Özünüz pıçhapıçla danışdıqlarınızı mən ictimailəşdirəndə "dəli" oluram? Ən azından vicdanım təmizdir, susmadığım üçün. Siz isə boyun əyirsiniz adı administratorlara (hamısına şamil olunmur). Ay aman, birdən burarlar sizi hansısa tədbirdən. Burublar da hər yerdən, möcüzə gözləyirsiniz? Hələ dünən bəziləri zəng ediblər ki, "nəyinə lazım yazma, demə, sabah sənə, ya uşağına nəsə edərlər. Bütün şadlıq sarayları məmurlarındır".
 
Qoy, məni bu sözləri yazdığıma görə şərləsinlər, ya da uşağıma nəsə etsinlər. Dərəbəylikdir? Bu nə qorxudur içinizdə?"