“Onu efirə çağıran adamın başı düzgün işləsəydi...” - Video

Bir neçə gün öncə ATV-də yayımlanan “Rəngarəng” verilişinin qonağı olan gənc ifaçı Zəhra Muradovanın efirdə canlı ifası ciddi müzakirələrə səbəb olub. Belə ki, çıxışı gözlənilən səviyyədə olmadığından aparıcı onun ifasını yarımçıq dayandırıb.

“Qafqazinfo” Bakupost.az-a istinadən xəbər verir ki, hadisədən sonra müğənni Sevinc Sarıyeva tələbəsi Zəhra Muradova haqqında sərt açıqlama verib.
“Mənim yanıma gəlirdi. Hələ ona “tələbəm” demirəm, çünki yanımda bir ayı belə tamam olmayıb. Yaxşı, çalışqan qızdır, dedim ki, maşallah, oxuyacaq. Amma baxıram, çıxıb Zaurun efirinə. O dəqiqə efirə zəng vurdum. Mən ona irad tutdum. Gözəl qızdır, efirə yaraşır. Ancaq gözəllik o demək deyil ki, çıxıb oxumalısan. Əvvəl bir müddət hazırlıq keçməli, sonra efirə çıxmalı idi. Belə olmaz”, - deyə müğənni bildirib.
Məsələ ilə bağlı verilişin digər qonağı Xalq artisti Zabit Nəbizadə açıqlamasında bildirib ki, ifaçıda günah görmür: “Mən o uşağı qınamıram. Ağır, çətin sənətdir. Həyəcandan da ola bilər. Onun hərəkətləri sənətindən super idi, 20 ilin oxuyanı oxuyanda o hərəkətləri, o ritmi tuta bilmir. Daxili ritmi var bu adamın, amma tonallığı bilmir, oxuyan deyil. Əslində səsi var, amma oxumaq asan bir şey deyil. Mən Zaura elə orada dedim ki, sən niyə bu uşağı belə sındırırsan? Canlı oxumaq lazımdırsa, çağır, tələbələrim gəlib oxusun. Onlar hər gün dərsdədir. Məktəb almaq başqa şeydir.
Mən vallah onda günah görmürəm. Sevinc Sarıyeva zəng vurub efirə dedi ki, məndən icazə almayıb gedib. İndi dedi də, o da özünü sığortalayırdı... Səndən niyə icazə almalıdır, valideyni deyilsən... Pulu var, verib çıxıb da yəqin. Fikrimcə, onu efirə çağıran adamın başı düzgün işləsəydi, mənim yanıma çağırmazdı. Özü də mənə demişdilər ki, sənə layiq sənətçilər çağırılacaq. Mən özüm orada dillənmədim. Mənim yerimə kim olsaydı, bəlkə də çıxıb gedərdi ki, bunlar kimdir ki, mənimlə efirə çağırmısan? Zauru çəkib qırağa dedim ki, sənə lazım idi bu? Öz efirini də gözdən salırsan”.
Qeyd edək ki, proqramda qonaq olan gənc müğənni Zəhra Muradovadan canlı oxuması istənilib. Bu zaman o, musiqiçilərin müşayiəti ilə oxumağa cəhd edib. Lakin onun səsi olmadığından ifası aparıcı Zaur Nəbioğlu tərəfindən yarımçıq kəsilib. Bu zaman Zəhra ilk dəfə efirə çıxdığı üçün həyəcanlı olduğunu və bu səbəbdən yaxşı oxuya bilmədiyini bildirib. Həmçinin bu sənətə yeni başladığını, 3 ay əvvəl isə paytaxtdakı salonların birində dırnaq ustası kimi fəaliyyət göstərdiyini söyləyib.