Aşıq Namiq: “Adam var, iki-üç bayağı mahnı oxuyur, sonra da fəxri ad istəyir”

Aşıq Namiq Fərhadoğlu aşıqlara Xalq artisti fəxri adının verilməməsinə münasibət bildirib.

Yenilik.az xəbər verir ki, O, Pravda.az-a açıqlamasında deyib ki, aşıqlara verilən Əməkdar mədəniyyət işçisi fəxri adı Əməkdar artist fəxri adı ilə eyni səviyyədədir.
“Əməkdar incəsənət xadimi fəxri adı da Xalq artisti adı ilə eyni dərəcədədir. Bu adı əvvəllər ustad aşıqlara verirdilər. İndiki dövrdə aşıqlar arasında Əməkdar incəsənət xadimi yoxdur. 30-40 il əvvəl var idi. Fəxri adların ləğvi barədə deyilənlər yalandır. Belə şey yoxdur, mən eşitməmişəm. Mədəniyyət naziri belə bir söz deməz. İnsan əziyyət çəkirsə, ona fəxri ad verilməlidir. Əməkdar artistə o qədər də yüksək qonorar verilmir. Sadəcə, cənab Prezident tərəfindən incəsənət nümayəndəsinə fəxri ad veriləndə insan daha da ruhlanır ki, əməyinə qiymət verilib. Elə sənətçilərimiz var ki, hərbi hissələrdə, qocalar evində, dövlət tədbirlərində konsert verirlər. Düşünürəm, sənəti yerindədirsə, xidmətləri varsa, belə sənətçilərə fəxri ad verilməlidir. Adam var, iki-üç bayağı mahnı oxuyur, sonra da fəxri ad istəyir. Aşıq, muğam sənəti zəngin, çətin sənətdir. Hər kəs öhdəsindən gələ bilmir. Vaxtilə butalı aşıqlarımız olub. Əsli və Kərəm, Qurbani, Abbas Tufarqanlı… Uzaq vilayətlərdə qalırdılar. Təyyarə yox idi, karvanla yol gedərdilər. Bədahətən şeir deyirdilər. Bu, bir istedaddır, hər adama verilmir. Həqiqətən, haqq aşıqlarımız olub. Bu gün elə aşıq var ki, 70 yaşındadır, hələ Əməkdar mədəniyyət işçisi deyil. Halbuki sovet dövründən xidmət etmiş aşıqlardır, amma fəxri adları yoxdur. Axı layiqdirlər, 70 yaşları var, bu ad onlara nə vaxt veriləcək?” – o bildirib.