Tacir Şahmalıoğlu: "Dedi get müharibəyə, əgər səni öldürməsələr..."

"Fərhad Bədəlbəyli mənim Azərbaycan Konservatoriyasında təhsil almağıma mane oldu".

Bunu Qaynarinfo-ya açıqlamasında müğənni Tacir Şahmalıoğlu Konservatoriyaya qəbul oluna bilməməsinin səbəblərindən danışarkən deyib. 

Müğənninin sözlərinə görə, Xalq artisti Fərhad Bədəlbəyli onu konservatoriyaya qəbul etməyib:

"Mənə dedi ki, get müharibəyə, əgər səni öldürməsələr, gəlib oxuyarsan. Həmin vaxt Birinci Qarabağ müharibəsi gedirdi. Müharibədə əlimə silah alıb vuruşmamışam, amma həmişə döyüş bölgələrində əsgərlərin yanında oldum. Hərbi hissələrdə konsertlər verdim. Mən də əsgərlərə belə kömək etdim, arxa cəbhə sayıldım. Vətənim üçün canımı da qurban verərəm. Allah vergisi idim, onu da Fərhad müəllim bilirdi. Qarşımı bunun üçün kəsdi".


Tacir Şahmalıoğlu rəsmi olaraq konservatoriyanın məzunu olmaq istəyib:

"Onunla mənim nə problemim var idi ki, Allah vergisi olan bir insanı qəbul etmədi, ali təhsil almasına mane oldu? Amma musiqidən xəbəri olmayanlar konservatoriyanı bitirdilər".

"Bu gün ürəyinizdən ona qarşı hansı hisslər keçir" sualına müğənninin cavabı belə oldu:

"Fərhad Bədəlbəyli ən böyük səhvə yol verib. Ona qarşı nə münasibət bəsləyə bilərəm? Onu heç vaxt bağışlamayacağam. Fərhad Bədəlbəyli məni Üzeyir Hacıbəyovun akademiyasından məhrum etdi. Bilirsiniz ki, mən "Üzeyir Hacıbəyovun sənət dostları", bundan əlavə 3 sənədli və bir bədii filmə çəkilmişəm. Həmin filmə mənim səsimi məsləhət biliblər. Səsimi qəbul etdilər, özümü konservatoriyaya qoymadılar. Kimdən əskik idim, mən də ali təhsil alardım".