Deputat: “Əli Kərimlinin evində axtarış aparılması ölkə daxilində asayişin təminatına xidmət göstərir”

“Azərbaycan Xalq Cəbhəsi Partiyasının (AXCP) sədri Əli Kərimlinin evində axtarış aparılır. Bu axtarışın Prezident Administrasiyasının sabiq rəhbəri Ramiz Mehdiyevin işi ilə bağlı həyata keçirilməsinə dair məlumatlar yayılıb. Artıq Azərbaycan ictimai fikrində belə bir mövqe formalaşıb ki, Ramiz Mehdiyevin Azərbaycandakı radikal qüvvələrlə sıx əlaqəsi olub. Bu faktı təsdiqləyən çoxsaylı sübutlar, dəlillər ortadadır. Təsəvvür edin ki, 2019-cu ilin oktyabr ayının 19-da Əli Kərimli Azərbaycanda hakimiyyət əleyhinə əvvəlki mitinqlərlə müqayisədə daha böyüyünü təşkil etməyə cəhd göstərdi. Bundan bir qədər sonra Ramiz Mehdiyev vəzifəsindən uzaqlaşdırıldı. Fikir verirsiniz, o vaxtdan bəri altı il keçib və altı il ərzində Əli Kərimlinin belə mitinqlər keçirməklə bağlı heç bir potensialı ortaya çıxmır. Belə cəhdlərin uğursuzluğu bəri başdan bəllidir. Çünki ona dəstək verən əsas qüvvə ortadan çıxıb. Azərbaycan ictimai mövqeyində bu fikir kifayət qədər möhkəm əsaslara malikdir. Deməli, Ramiz Mehdiyev Əli Kərimlini dəstəkləyirdi, maliyyə, inzibati dəstək verirdi. İstəyirdi, belə bir fon yaratsın ki, əgər Ramiz Mehdiyev olmasa, Əli Kərimli və bütövlükdə müxalifətin, onun artan mitinqlərinin qarşısında dayanmaq mümkünsüz olacaq”.

 
Bu sözləri Pravda.az-a açıqlamasında Milli Məclisin deputatı Elman Nəsirov deyib.
 
“Gördüyünüz kimi, Ramiz Mehdiyev hakimiyyətdən uzaqlaşdırıldıqdan sonra daha bu tip mitinqlər yoxdur. Əli Kərimlinin də bu istiqamətdə hər hansı cəhdləri tam uğursuzluğa düçar olur. Deməli, Ramiz Mehdiyev Əli Kərimlidən istifadə edirdi, onu gizli şəkildə dəstəkləyirdi. Eyni zamanda, burada ilk baxışdan qəribə görünən, əslində isə çox həqiqətlərə işıq salan başqa bir reallıq da diqqətdən yayınmır. Belə ki, xaricdəki söyüş müxalifəti son zamanlar bir-birinin ardınca öz fəaliyyətinə özü xitam verir. Deyirlər ki, maliyyə dəstəyi olmadan fəaliyyətimizi davam etdirə bilmirik. Bizə ayda üç-beş min avro pul lazımdır, o da bizdə yoxdur. Təbii ki, sual yaranır - illərdir, Azərbaycan dövləti, dövlətçiliyi əleyhinə qənim kəsilmisiniz, saxta, feyk məlumatlar paylaşırsınız, insanların şərəf və ləyaqətini alçaltmaq işi ilə məşğulsunuz, dezinformasiya paylaşmaq siyasətini həyata keçirirsiniz, nə oldu, birdən-birə sizin maliyyə imkanlarınız yoxa çıxdı? Deməli, Ramiz Mehdiyevə ev dustaqlığı verilib və bu anti-milli ünsürlərə, milli dönüklərə pul göndərmək imkanları məhdudlaşıb. Onlar da özlərini "bankrot" elan etməyə başlayıblar. Sinxronluq və Ramiz Mehdiyevlə əlaqə diqqətdən yayınmır. Həm də burada başqa bir həqiqət də var. Rusiya-Ukrayna müharibəsinin yaxın zamanda bitəcəyi istisna deyil. Belə olan halda Rusiyanın yenidən Cənubi Qafqazda möhkəmləndirmək istiqamətində addımlar atacağını proqnozlaşdırmaq da elə çətin deyil. Bəs kimin hesabına? Yenə də Ramiz Mehdiyev və ona bağlı olan qüvvələr hesabına. Ölkə daxilində çaxnaşma salsınlar, səfərbər olunmuş cəmiyyəti parçalasınlar, vətəndaş həmrəyliyini pozsunlar, xalq və Prezident ətrafındakı monolit birliyi dağıtsınlar. Bunun üçün kimdən istifadə etsinlər? Təbii ki, Ramiz Mehdiyevlə bağlı olan qüvvələrdən. Həmin qüvvələrin sırasında Əli Kərimlinin olması çoxsaylı faktlar öz təsdiqini tapır. Buna görə də hesab edirəm, bu gün Azərbaycan hökumətinin atdığı addımlar tam məntiqli, qanunauyğundur. İmkan vermək olmaz ki, böyük zəhmət hesabına qazanılan uğurlarımıza kimlərsə kölgə salsın. İmkan vermək olmaz ki, bütün uğurlarımızın kökündə dayanan bu siyasi sabitliyi, xalq-Prezident birliyini kimlərsə pozsun, prosesə əngəl törətsin. Biz bu sabitliyi göz bəbəyi kimi qorumalıyıq. Bütün bu sabitliyə yönəlmiş qara əllərin qarşısını almalıyıq. Və bu baxımdan AXCP sədrinin evində axtarış aparılması tam qanunauyğundur. Hüquqi addımdır. Bu, ilk növbədə Azərbaycan dövlətinin təhlükəsizliyi və ölkə daxilində asayişin təminatına xidmət göstərir”, - deputat qeyd edib.