Əliyev və Paşinyan bu həftə sülh sazişi imzalayacaq - Məkan AÇIQLANDI

Azərbaycan Prezidenti İlham Əliyev və Ermənistanın baş naziri Nikol Paşinyan cümə günü Vaşinqtonda sülh sazişi imzalamaq üçün görüşə hazırlaşırlar.

Bu barədə ABŞ Dövlət Departamentində akkreditə olunmuş jurnalist Aleks Raufoglu (Ələkbər Raufoğlu) sosial şəbəkə hesabında məlumat verib.
Bildirilib ki, cümə günü ABŞ Prezidenti Donald Tramp Azərbaycan və Ermənistan liderlərini Ağ Evdə qəbul edəcək. Toyuqlu pizza
Xatırladaq ki, iyulun 10-da Azərbaycan Prezidenti İlham Əliyev və Ermənistanın Baş naziri Nikol Paşinyan arasında Əbu-Dabidə keçirilən birbaşa danışıqlarda sülh sazişinin mətninin paraflanmasını ara variant kimi nəzərdən keçirmişdilər.
Məlum olduğu kimi, Azərbaycan sülh sazişinin imzalanması üçün əlavə şərt olaraq Ermənistan Konstitusiyasına dəyişikliklərin edilməsini, bu ölkənin Qarabağa olan iddialardan imtina etməsini, həmçinin ATƏT-in Minsk qrupunun buraxılmasını tələb edir.
Ermənistan Konstitusiyasının bu qədər qısa müddətdə dəyişdirilməsi mümkün və real görünmədiyindən, rəsmi Bakı mart ayında razılaşdırılmış mətnin paraflanması variantını təklif edib. Bu baxımdan, Əliyev və Paşinyanın Vaşinqtona sənədin yalnız paraflanması üçün, yoxsa yekun sülh sazişinin imzalanması üçün dəvət olunduqları hələlik məlum deyil.
Son günlər ABŞ rəsmiləri bəyan ediblər ki, Azərbaycan və Ermənistan sülhün bir addımlığındadır. Bu yaxınlarda Bakı və İrəvana səfər etmiş respublikaçı senator Stiv Deyns ötən həftə “The Wall Street Journal” qəzetində dərc olunan məqaləsində yazıb ki, Tramp administrasiyası Azərbaycanla Ermənistan arasında sülh prosesində əhəmiyyətli irəliləyişə nail olub.
“Prezident Tramp Cənubi Qafqazda - Ermənistan və Azərbaycan arasında sülh sazişinin imzalanması ərəfəsindədir. Bu, böyük bir nailiyyət - həm regional, həm də beynəlxalq sülhə töhfə verən və iştirak edən ölkələrin sərhədlərindən kənarda da iqtisadi faydalar gətirən növbəti addım olardı,” - deyə senator yazıb.
Onun sözlərinə görə, indi Ermənistan və Azərbaycan Rusiya təsirindən azad olaraq, ABŞ-ın prioritetlərinə uyğun gələn müstəqil gələcək vizyonuna doğru yönəlirlər. Region öz gələcəyini özü müəyyənləşdirəcək və bu gələcəyin əsasını ABŞ ilə tərəfdaşlıq təşkil edəcək. Bu tərəfdaşlıq isə təkcə Cənubi Qafqazda deyil, onun hüdudlarından kənarda da rifahın əsasını qoyacaq.
ABŞ Prezidenti Tramp 18 iyulda bildirib ki, tərəflər sülhə yaxındır.
“Ermənistan, Azərbaycan - biz orada bir möcüzə yaratdıq və bu  artıq hədəfə çox yaxındır,” - deyə Tramp vurğulayıb.
Məlum olduğu kimi, Tramp administrasiyası həmçinin Zəngəzur dəhlizi ilə bağlı plan təqdim edib. Bu plana əsasən, Ermənistan ərazisindən keçən 42 kilometrlik kommunikasiya xətlərinə ABŞ-ın özəl şirkəti nəzarət etməlidir. Görünür, Ermənistan tərəfi bu variantı qəbul etməyə hazırdır. Buna görə də Ağ Evin Zəngəzur dəhlizi ilə bağlı razılaşmanı da elan etməsi istisna deyil.