Təhlükəli çipsilər satışda – AQTA hara baxır? – Araşdırma, Foto

Xəbər verdiyimiz kimi Azərbaycan Qida Təhlükəsizliyi Agentliyi “Chipsim Kabab”, “Chipsim Tomat”, “Rekord” çipslərinin tərkibində E-621 qida əlavəsinin normadan artıq olması səbəbilə satışdan çıxarıb.

Tribunainfo.az xəbər verir ki, artıq iki gündür bu çipslərin satışına qadağa qoyulsa da, əksər marketlərin rəflərində hələ də bu çipslərə rast gəlmək mümkündür. Zərərli qida əlavəsiylə zəngin olan bu çipslər açıq formada satılır. Digər bütün marka çipslər kimi onlar da rəfləri “bəzəməkdədir”.
Görünür ya AQTA bu barədə marketlərə göstəriş verməyib, ya da əksər böyük marketlər şəbəkəsi AQTA-nın bu tapşırığını vecinə də almır.
Dəhşətlisi isə odur ki, daha çox uşaqların sevdiyi və aldığı tərkibi zərərli E-621 qida əlavəsi ilə zəngin olan bu çipslərin açıq şəkildə satışı davam edir.
Bəs nədir bu zərərli E-621 qida əlavəsi, onun nə kimi zərərləri var?
Elmi adı mononatrium qlütamat olan E-621 qida əlavəsi daha çox yeməklərin dadını gücləndirmək üçün geniş istifadə olunur. Bu maddə qlütamat turşusunun natrium duzudur və emal olunmuş qidaların etiketlərində “E621” və ya “monosodium glutamate” kimi qeyd olunur. Bu maddə qida sənayesində əsasən kolbasa, sosiska, hazır şorbalar, “fast food”, çips və konservlərdə geniş istifadə olunur. Yol verilən həddən artıq qəbul edildikdə, insanlarda allergik reaksiyalar, nevroloji təsirlər, həmçinin “Çin restoranı sindromu” adlanan simptomlar yarana bilər. Bunlara baş ağrısı, boyun və sinə nahiyəsində gərginlik, tərləmə, ürək döyüntüsünün artması və halsızlıq kimi əlamətlər daxildir.
Beynəlxalq təşkilatlar bu maddənin normal miqdarda istifadəsinin təhlükəsiz olduğunu bildirir. Ancaq gündə 3-5 qram və daha çox qəbul edildikdə bəzi insanlarda allergik reaksiyalar yarana bilər. Xüsusilə uşaqlar, hamilə qadınlar və bu maddəyə həssaslığı olan şəxslər ehtiyatlı olmalıdır. Qida etiketlərində mononatrium qlütamat müxtəlif adlarla qeyd oluna bilər. İstehlakçılar xüsusilə monosodium glutamate, E-621, hidrolizə olunmuş bitki zülalı, ləzzət artırıcı və natrium qlütamat kimi ifadələrə diqqət yetirməlidirlər.
Nəzərə almaq lazımdır ki, E-621 bir çox fərqli məhsulda ola bilər və gün ərzində müxtəlif mənbələrdən qəbul edildikdə onun təsiri artaraq sağlamlığa zərər verə bilər. Buna görə də istehlakçılar rasionlarında bu maddənin miqdarına nəzarət etməli, mümkün qədər az istifadəsinə üstünlük verməlidirlər.
Gülşən Rəsul