“Prezidentin bu ölkəyə səfəri mühüm siyasi əhəmiyyət daşıyır”

Azərbaycan bütün ölkələrlə həm ikitərəfli münasibətlər əsasında, həm də beynəlxalq təşkilatlar çərçivəsində səmərəli və qarşılıqlı faydalı əməkdaşlıq əlaqələrini uğurla davam etdirir. İslam dünyası ölkələri ilə münasibətlərin inkişaf etdirilməsi Azərbaycan xarici siyasətinin prioritet istiqamətlərindən biridir. Bu kontekstdə Azərbaycan-BƏƏ əlaqələri hər zaman müsbət inkişaf dinamikası ilə diqqət çəkib. Yüksəksəviyyəli dialoq mühitində dərinləşən münasibətlər siyasi, iqtisadi və mədəni əməkdaşlıq sahələrində özünü aydın göstərməkdədir. İslam dünyasının zəngin ölkələrindən biri olan Birləşmiş Ərəb Əmirlikləri BMT-nin, İƏT-nin və digər beynəlxalq təşkilatların toplantılarında daim Azərbaycanın haqq işini müdafiə edib.

Hər iki ölkənin yüksəksəviyyəli rəsmiləri səviyyəsində reallaşan müntəzəm qarşılıqlı səfərlər və hökumətlərarası əlaqələr qarşılıqlı əməkdaşlığın yüksələn xətt üzrə inkişafına öz töhfəsini verir. Dövlət başçılarının intensiv təmasları Azərbaycan-BƏƏ münasibətlərinin uzunmüddətli strateji baxış əsasında inkişaf etdiyini təsdiqləyir.
Dekabrın 17-si Prezident İlham Əliyevin Birləşmiş Ərəb Əmirliklərinə rəsmi səfəri iki ölkə arasında son illərdə ardıcıl şəkildə formalaşan strateji tərəfdaşlıq münasibətlərinin məntiqi davamı kimi mühüm siyasi əhəmiyyət daşıyır. Bu səfər təkcə ikitərəfli gündəlikdə duran məsələlərin müzakirəsi baxımından deyil, eyni zamanda, Azərbaycanın Yaxın Şərq və Körfəz regionu ilə əlaqələrinin genişləndirilməsi və dərinləşdirilməsi kontekstində də xüsusi önəm kəsb edir.
Prezident İlham Əliyevin Əbu-Dabidə keçirilən “Gələcəyin Oyunları 2025” adlı qlobal idman turnirinin açılış mərasimində iştirakı iki ölkə arasında mövcud olan yüksəksəviyyəli siyasi dialoqun və qarşılıqlı etimadın bariz göstəricisidir.
Azərbaycanla Birləşmiş Ərəb Əmirlikləri arasında əməkdaşlığın əsas sütunlarından biri enerji sahəsində əməkdaşlıqdır. Bu əməkdaşlıq artıq yalnız ənənəvi neft-qaz sektoru ilə məhdudlaşmır. Bərpaolunan enerji, yaşıl texnologiyalar və dayanıqlı enerji infrastrukturu istiqamətində planlaşdırılan və həyata keçirilən layihələr tərəflərin gələcəyə yönəlik inkişaf prioritetlərinin üst-üstə düşdüyünü nümayiş etdirir. Azərbaycanın yaşıl enerji potensialı və BƏƏ-nin bu sahədə qlobal təcrübəsi əməkdaşlığa yeni keyfiyyət və məzmun gətirir.
Qarşılıqlı investisiya sahəsində əməkdaşlıq da münasibətlərin mühüm istiqamətlərindən biridir. BƏƏ üçün Azərbaycan sabit siyasi mühitə, əlverişli investisiya imkanlarına və mühüm tranzit mövqeyinə malik etibarlı tərəfdaş kimi dəyərləndirilir. Nəqliyyat-logistika, kənd təsərrüfatı, rəqəmsal iqtisadiyyat, eləcə də işğaldan azad edilmiş ərazilərdə həyata keçirilən bərpa və yenidənqurma layihələri BƏƏ şirkətlərinin xüsusi maraq dairəsindədir. Azərbaycanın Orta Dəhliz üzərində yerləşməsi bu marağı daha da artıraraq ölkəmizin regional iqtisadi proseslərdə rolunu gücləndirir.
Siyasi və diplomatik müstəvidə Bakı ilə Əbu-Dabi arasında tam anlaşma mövcuddur. Hər iki dövlət beynəlxalq münasibətlərdə suverenliyə, ərazi bütövlüyünə, qarşılıqlı hörmətə və praqmatik əməkdaşlığa əsaslanan yanaşmanı bölüşür. Regional və qlobal təhlükəsizlik məsələləri ətrafında aparılan fikir mübadiləsi tərəflərin bir sıra fundamental mövzularda eyni mövqelərdən çıxış etdiyini göstərir.
Postmünaqişə dövründə Azərbaycanın həyata keçirdiyi genişmiqyaslı bərpa və yenidənqurma layihələri də Azərbaycan-BƏƏ əməkdaşlığı üçün yeni imkanlar açır. Yaşıl enerji zonalarının yaradılması, “ağıllı şəhər” və kənd konsepsiyalarının tətbiqi ilə bağlı aparılan müzakirələr bu əməkdaşlığın konkret və praktik nəticələr verəcəyinə əsaslı zəmin yaradır. Prezident İlham Əliyevin Birləşmiş Ərəb Əmirliklərinə səfəri Azərbaycanla BƏƏ arasında siyasi etimad, iqtisadi sinerji və gələcəyə yönəlik strateji baxış üzərində qurulan tərəfdaşlığın uzunmüddətli perspektivlərə malik olduğunu təsdiqləyir.