Bu xəbərdən sonra yumurtanın ağını yeməyəcəksiz

Zülal tərkibli qidaların orqanizmə təsiri uzun illərdir alimlərin diqqət mərkəzindədir. Xüsusilə bağırsaq mikrobiomu, yəni orqanizmdə yaşayan faydalı mikroorqanizmlər insan sağlamlığının əsas sütunlarından biri kimi qəbul edilir.Şimali Karolina Universitetinin alimləri müəyyən ediblər ki, yumurta ağında mövcud olan zülal, bağırsaq divarını qoruyan selikli qatı zəiflədən maddələrin yaranmasını təşviq edə bilər.
Təcrübələr zamanı siçanlar yalnız fərqli zülal mənbələri ilə zənginləşdirilmiş pəhrizlərlə qidalanıblar. Cəmi yeddi gün ərzində onların bağırsaq mikrobiotasında əhəmiyyətli dəyişikliklər baş verib. Araşdırmada istifadə olunan metagenomik və metaproteomik analizlər göstərib ki, müxtəlif növ zülallar mikrobiomun fəaliyyətinə və maddələr mübadiləsinə fərqli şəkildə təsir göstərir.
Postdoktorant Alfredo Bleikli-Ruizin sözlərinə görə, hər bir zülal növü bağırsaq mikroblarında özünəməxsus dəyişikliklərə səbəb olurdu. Xüsusilə qəhvəyi düyü, maya və yumurta ağı ilə qidalanan siçanlarda bu təsir daha qabarıq hiss olunub. Bəzi pəhrizlər bağırsaqda amin turşuları parçalamaqla məşğul olan mikroorqanizmlərin fəallığını artırırdı.
Mütəxəssislər hesab edirlər ki, bu amin turşuların parçalanmasından yaranan maddələr nəinki ümumi sağlamlığa, hətta beyin və bağırsaq arasındakı əlaqəyə də təsir göstərə bilər.
Tədqiqatın daha bir maraqlı nəticəsi isə ondan ibarət olub ki, zülallarla birlikdə qəbul edilən mürəkkəb karbohidratlar, bağırsaq mikroorqanizmlərinin hansı növ fermentlər sintez etdiyini dəyişə bilir. Məsələn, yumurta ağı ilə bəslənən heyvanlarda aktivləşən bir bakteriya, bağırsağın selikli qatını təşkil edən musini parçalamağa bənzər fermentlər ifraz etməyə başlayıb. Bu da onu göstərir ki, bəzi zülal əsaslı qidalanma formaları həzm sistemi üçün müəyyən təhlükələr yarada bilər.