Qadınların sevərək geyindiyi lasinlər zəhərli imiş

Qadınların gündəlik həyatda idman edərkən və ya evdə geyindikləri lasinlər sağlamlığı təhdid edir.

Doktorm.az xarici KİV-ə istinadla xəbər verir ki, buna səbəb isə lasinlər hazırlanarkən istifadə edilən zərərli maddələrdir.
Belə ki, ABŞ-nin “The Cut” jurnalı elmi mənbələrə istinadla sosial mediada PFAS-ın (təbiətdə asanlıqla parçalanmayan kimyəvi maddələr qrupu) zərərlərinə diqqət çəkib.
ABŞ-nin Nyu York Universitetinin Moda Texnologiya İnstitutunun kimya professoru Karen Pearson bildirib ki, PFAS son 20 ildə geyimlərdə, xüsusən də suya davamlı, tər tutmayan, qoxu ilə mübarizə aparan və nəfəs ala bilən idman və açıq geyimlədə daha çox yayılıb.
Bu kimyəvi maddələr sonsuzluq, qalxanabənzər vəzinin xəstəlikləri, bəzi xərçəng növləri və xüsusilə qadınlarda hormonal sistemdə pozulmalarla əlaqələndirilir.
2022-ci ildə sağlam həyat məhsulları ilə bağlı məzmun təklif edən “Mamavation” platformasının apardığı sınaqlarda “Athleta” və “Lululemon” kimi markalara aid lasinlərdə PFAS izləri aşkarlanıb. “Lululemon” 2023-cü ildən PFAS istifadəsini dayandırdığını açıqlayıb. Bu maddələrin bir neçə yuyulmadan sonra yoxa çıxdığı bildirilsə də, bununla bağlı heç bir aydın dəlil yoxdur.
PFAS təkcə fərdi sağlamlığa təsir etmir; ətraf mühiti də təhdid edir. Yuyulma zamanı su ilə qarışaraq təbiətə yayıla bilən bu kimyəvi maddələr ABŞ-nin bəzi ştatlarında, o cümlədən Kaliforniya və Nyu Yorkda qadağan edilib. “Bloomberg”in xəbərinə görə, “Patagonia”, “Canada Goose”, “L.L. Bean”, “Nike” və “Columbia” da daxil olmaqla bir çox marka da PFAS-sız istehsala dair öhdəlik götürüb. 
Mütəxəssislər PFAS sertifikatı olmayan və təbii liflərdən hazırlanmış paltarları tövsiyə edirlər./Ölkə.Az