Sumqayıtda "bəzək üçün" tikilən bağça - ŞİKAYƏT

Sumqayıt şəhərinin Bulvar küçəsində yerləşən Sumqayıt yaşayış massivində (MİDA) artıq bir ildən çoxdur ki, sakinlər məskunlaşıb. Lakin ərazidə mühüm sosial problemlərdən biri hələ də öz həllini tapmayıb.

Sumqayit24.az-a müraciət edən sakinlərin sözlərinə görə, yaşayış massivində hərşeylə tam təchiz olunmuş, bütün lazımi avadanlıqlarla təmin edilmiş uşaq bağçası var. Buna baxmayaraq, bağça hələ də fəaliyyətə başlamayıb.
Ərazidə yalnız özəl uşaq bağçaları fəaliyyət göstərir. Dövlət bağçaları isə yaşayış massivindən xeyli uzaqda yerləşir. Bu vəziyyət valideynləri çətin seçim qarşısında qoyur: ya əlavə xərcə girərək uşaqlarını özəl bağçalara verməli olurlar, ya da qadınlar iş həyatından kənarda qalaraq evdə oturmalı olurlar.
Digər bir problem isə yaxınlıqdakı özəl uşaq bağçalarının əksəriyyətinin dövlət akkreditasiyasından keçməməsidir. Məlumdur ki, müəyyən hallarda dövlət qeydiyyatında olan özəl bağçalar üçün aylıq ödənişin böyük bir hissəsi dövlət tərəfindən qarşılanır. Lakin akkreditasiyadan keçirilməyən sözügedən özəl bağçalarda bu dəstəkdən istifadə mümkün deyil.
Sakinlər məsələ ilə bağlı aidiyyəti qurumlara müraciət edərək, artıq hazır vəziyyətdə olan uşaq bağçasının tezliklə istifadəyə verilməsini tələb edirlər. Onların sözlərinə görə, bu addım həm valideynlərin maddi yükünü azaldar, həm də ailələrin sosial rifahına ciddi töhfə verər.
Məsələ ilə Abşeron-Xızı Regional Təhsil İdarəsinə sorğu ünvanlanıb.