“Bu təhsil deyil, travmadır” – Valiyenlərdən summativlərə qarşı ETİRAZ

Buraxılış imtahanını verən abituriyentlər yenidən məktəbə çağırılır – Valideynlər və şagirdlər etiraz edir

Mart ayında buraxılış, mayın sonunda isə blok imtahanlarını verən 11-ci sinif şagirdləri indi də summativ qiymətləndirmə üçün məktəbə çağırılır. Universitetə qəbul üçün tələb olunan bütün imtahanları başa vuran abituriyentlərin yenidən məktəb partasına qayıtması nə şagirdlər, nə də valideynlər üçün məntiqli görünmür. Bu vəziyyət ictimai narazılığa səbəb olub.

Tribunainfo.az xəbər verir ki, valideynlər sosial şəbəkələrdə bu qaydaya qarşı çıxaraq fikirlərini bildiriblər. Yazar, jurnalist Ramilə Qurbanlı mövcud duruma etiraz edərək yazıb:
“Təhsil Nazirliyi ilə DİM-in bir araya gəlib buraxılış-qəbul imtahanlarından sonra uşaqların məktəbə gedib BSQ, KSQ yazmaq kimi məntiqsizliyin qarşısını aldıqları günü görmək qismətimiz olsun. Ay qardaş, dərslər bitər, buraxılış imtahanı olar, əlvida məktəb, sonra da qəbul imtahanı. Yoxsa, uşaqların düşüncəsində əlvida olub artıq, amma məktəb bitmək bilmir. Müəllimlərin də əlinə imkan düşür, başlayırlar təhdidə – ay, attestat alın görüm-filan. Ay başbilənlər, niyə bu təhdidə imkan yaradırsınız? Uşaq artıq o havada deyil e, bu qəbul imtahanı verib, onun cavabı havasındadır. İki ildir mütəmadi hazırlıqlar, imtahanlar (11 ili demirəm) çöküblər, hava da isti. Məktəb onun üçün tarixə qovuşub, o böyüyüb artıq, bir siz də böyüyün!”.

Jurnalist Zülfiyyə Quluyeva isə bu qiymətləndirmələrin heç bir əhəmiyyət daşımadığını qeyd edib:
“DİM-in buraxılış imtahanından sonra məktəblərdə 11-ci siniflərə BSQ işlətməyin mənasını heç cür başa düşə bilmirəm”.

“Təmir Dünya” Qadınlara Yardım İctimai Birliyinin sədri Mehriban Zeynalova isə məsələyə daha sərt münasibət bildirib:
“Məktəbdə il boyu keçirilən summativlər uşaqlar üçün inkişaf yox, işgəncəyə çevrilib. İl boyu nə qədər imtahan olar? Hörmətli Elm və Təhsil Nazirliyi, biz də təhsil almışıq. Gördüyünüz kimi təhsilimiz də normaldır. Bu məsələyə mümkünsə bir çözüm edin. Uşaqlara bu nə travmadı yaşadırsınız? Vallah, billah bu travmadır, təhsil deyil. Uşaqlar stressdən əzab çəkir. Mən təhsili sevən, dəstəkləyən adamam, amma bu yanaşmanı yanlış hesab edirəm”.
Valideynlər və təhsil ekspertləri bu məsələ ilə bağlı Elm və Təhsil Nazirliyindən izahat və dəyişiklik gözləyirlər. Şagirdlərin artıq akademik prosesi başa vurduğu bir mərhələdə əlavə imtahan yükünün onların psixoloji durumuna mənfi təsir etdiyi vurğulanır.