Qobu məktəbliləri deputatla birlikdə təmizlik aksiyası keçiriblər

Ekologiya və Təbii Sərvətlər Nazirliyinin dəstəyi ilə Qobu qəsəbəsinin Ə.İbrahimov adına 2 nömrəli tam orta ümumtəhsil məktəbinin şagirdlər və deputat Nigar Məmmədova tərəfindən Sumqayıt şəhəri sahilyanı ərazisinin təmizlənməsi aksiyası təşkil olunub.

Deputat N.Məmmədova bildirib edib ki, aksiyanın əsas məqsədi Xəzər dənizinin biomüxtəlifliyinin mühafizəsinə töhfə vermək, ərazilərin məişət tullantılarından təmizlənməsini təmin etmək, ətraf mühitin qorunması və məktəblilər arasında ekoloji şüurun artırılmasıdır.

“Uşaqların böyük həvəslə bu işdə iştirak etməsi göstərdi ki, gələcəyimiz olan gənc nəsil təbiətə biganə deyil. Bu kimi aksiyalar həm ekoloji şüur formalaşdırır, həm də hər bir uşağın ətraf mühitin qorunmasında məsuliyyətli vətəndaş kimi yetişməsinə töhfə verir”, – deyə Nigar Məmmədova vurğulayıb.