Un yenə bahalaşdı - Video

Azərbaycanda unun qiyməti artmaqda davam edir.

Yenilik.az-ın Xezerxeber.az-a istinadən verdiyi məlumata görə, qiymət artımı 50 kiloqramlıq un kisəsində daha çox hiss olunur.
Belə ki, əvvəlki aylarda 27 manata satılan 50 kiloqramlıq un kisəsinin hazırda satış məntəqələrində 32 manat və daha baha təklif olunduğu bildirilir.
Satıcılar bahalaşmaya əsas səbəblərdən biri kimi dəyirmanlarda qiymətlərin artmasını göstərirlər. Bahalaşmanın bütün un növlərində özünü göstərdiyi qeyd olunur.
İqtisadçı ekspert Fuad İbrahimov dünya bazarında unun qiymətində ciddi artımın müşahidə olunmadığını deyib. Onun sözlərinə görə, qiymət artımı müəyyən şirkətlərin yanaşmasından qaynaqlanır.
Ekspert həmçinin bildirib ki, taxıl sahələrində biçim dövrü başlayanda qiymətlərin yenidən enəcəyi proqnozlaşdırılır.
Xatırladaq ki, bir müddət əvvəl də unun qiymətində artım baş vermişdi. Belə ki, aprel ayında 50 kiloqramlıq unun qiyməti 25 manat 5 qəpik təşkil edirdisə, may ayında bu qiymət 27 manat 35 qəpiyə çatmışdı.