"İsa Həbibbəyli, bu görüntülərdən sonra istefa verib getməlisən!" – Qənirə Ataşdan sərt çağırış

AMEA prezidenti İsa Həbibbəylinin Vatikan nümayəndə heyətinə qədim əlyazmanı təqdim edərkən onu sürətlə vərəqləməsi və əlyazma ilə kobud davranması ciddi qalmaqala səbəb olub. Sosial şəbəkələrdə geniş müzakirələrə yol açan görüntülərdən sonra bir sıra tanınmış şəxslər İsa Həbibbəylini sərt şəkildə tənqid ediblər.

Musavat.com xəbər verir ki, tənqidlərə ABŞ-da yaşayan jurnalist Qənirə Ataş da qoşulub. O, AMEA prezidentini bu addımına görə istefaya çağırıb.
Qənirə Ataş bildirib:

"Nizami Gəncəvi təkcə Azərbaycanın deyil, bütün bəşəriyyətin mənəvi irsidir. Belə bir irsə münasibət isə vəzifə ilə yox, mədəniyyətlə, məsuliyyətlə və vicdanla ölçülür.
İsa Həbibbəyli kimliyindən, titulundan və vəzifəsindən asılı olmayaraq unutmamalıdır ki, heç bir vəzifə insanı tarixin və xalqın irsindən üstün etmir. Akademik adı almaq hələ mədəniyyət sahibi olmaq demək deyil. Əsl elm adamı əlyazmaya kağız kimi yox, millətin yaddaşı kimi baxmalıdır. Təəssüf ki, Azərbaycanda bəzən ən müqəddəs yerlərdə ən məsuliyyətsiz adamlar oturur. Vəzifə var, titul var, kreslo var, amma baş yoxdur. Xalqa da, tarixə də, irsə də bu cür yanaşan məmurların problemi elə budur: onlar xidmət etmirlər, sahiblik edirlər.
Nizami Gəncəvinin irsi sənin şəxsi mülkün deyil. O, xalqın yaddaşıdır.
Bu görüntüdən sonra o, özü istefa verib getməlidir".
Qeyd edək ki, sözügedən görüntülərin yaratdığı geniş ictimai müzakirələrə və səslənən tənqidlərə baxmayaraq, Azərbaycan Milli Elmlər Akademiyası tərəfindən məsələ ilə bağlı hələlik hər hansı rəsmi açıqlama verilməyib.