Azərbaycanlı deputat Volkan Konakdan yazdı: Ürəktutmasında bunu etməlisiniz…

Dünən, Şimali Kiprdə konsert verən məşhur sənətçi Volkan Konak səhnədə qəfil ürək tutması keçirdi və həyatını itirdi. Təəssüf ki, hadisə zamanı onun yanında olanlar ilkin yardım tədbirlərini – xüsusilə CPR-i (ürək masajı və süni tənəffüs) tətbiq edə bilmədi. Bu faciə bir daha göstərdi ki, CPR yalnız tibbi işçilərin yox, cəmiyyətin hər bir üzvünün bilməli olduğu həyati bacarıqdır.

Bu barədə deputat, əməkdar həkim Rəşad Mahmudov Feysbuk sosial şəbəkə hesabında paylaşım edib. O qeyd edib ki, qəfil ürək dayanması hər yerdə – konsertdə, küçədə, məktəbdə, metroda, evimizdə – baş verə bilər. Və çox vaxt həyatı xilas edən, xəstəxana və ya həkim yox, ətrafdakı insanın ilk saniyələrdə müdaxiləsidir:
“Məlumat üçün bildirmək istəyirəm ki, dünənki kimi ani ürək dayanmasından sonra beyin və digər həyati orqanlara qan axını 3-5 dəqiqə ərzində bərpa olunmasa, daimi beyin zədəsi və ölüm riski artır. Ən gec bir dəqiqə içində başladılan CPR isə bu qan axımını müvəqqəti bərpa edərək xəstənin sağ qalma şansını 2-3 dəfə artırır. Ürək masajı və süni tənəffüs tətbiq etməyi bilmək, öyrənmək vacibdir”.