Hafiz Hacıyev Şərurlu İsfəndiyardan armatur istəyib? – “Bir dəfə ona zəng etmişəm...”

Müasir Müsavat Partiyasının sədri Hafiz Hacıyev “Şərur” MTK-nın sahibi İsfəndiyar Axundovdan (Şərurlu İsfəndiyar) beton, armatur istəməsi, lakin istədiyini ala bilmədiyi üçün İ.Axundovla bağlı tənqidlər səsləndirməsi barədə fikirləri təkzib edib.

 
H.Hacıyev Pravda.az-a açıqlamasında növbəti dəfə Şərurlu İsfəndiyarın ünvanına sərt tənqidlər səsləndirib.
 
“Bizə nə beton, nə də armatur lazımdır. Biz siyasətlə məşğuluq. Siyasətdə beton, armatur elə İsfəndiyar kimi adamlara sözümüzü deməkdir. O, bir dəfə bizim işçimizi aldatmışdı. Müşavirimizə Yeni Günəşli tərəfdən ev verilmişdi, onun sənədlərini vermirdi, pulunu alıb, aldatmışdı. Mən də zəng etdim, dedim ki, aldatmağa adam tapmırsan? Sənədləri ver. Bir dəfə həmin vaxt İsfəndiyara zəng etmişəm. Sənədləri ala bildik. İndi də deputatları, Misir müəllim kimi ziyalımızı tənqid edir. Özü də deyir ki, savadsızam. Savadsızsan, get işinlə məşğul ol. Onun danışdıqları hamısı cəfəngiyyatdır, yalandır. Ağlı çaşıb, deyir ki, məktəb tikək, məscidləri bağlayaq. Cinayətin içindədir, indi də bilmir ki, ictimaiyyətin fikrini özündən necə yayındırsın. Bir evi iki-üç nəfərə verib, hamını aldadıb. Camaat da ayağa qalxıb. Yaxşı, Hafiz Hacıyev İsfəndiyarı tənqid edib. Bəs Milli Məclisin deputatları, digər ziyalalılarımız onun barəsində ciddi fikirlər səsləndirdilər. Bu adam başını itirib. Ziyalıları qoyun hesab edir. Vəziyyətdən çıxış yolu axtarır. İnsitutları təhqir edir ki, tələbə yetişdirilmir. Hər şeyə bir “mız” qoyur. Ramiz Mehdiyevin himayədarlıq etdiyi adamlardan nə olacaq?” - o bildirib.
 
O, Şərurlu İsfəndiyarın “beton, armature” açıqlamasından sonra villa, obyekt tikdirməsi barədə iddialara da cavab verib: “Hafiz Hacıyevin nə villası var, nə də obyekti. Hafiz Hacıyev şəffaf adamdır. Hamı da görür ki, mən necə yaşayıram. Bircə ermənilərlə dəyişdirdiyimiz ev var, qalmışıq orada. Bizim bəxtimiz yoxdur, bizə qismət olmayıb. Şərurlu İsfəndiyar kimilər elə şeyi bacarırlar. Bizim kimi təmiz adamlar üçün həyat, yaşamaq çox çətindir. Armatur lazım olsa, satılır, gedib alarıq. Ehtiyac yoxdur. Bina tikdirmirəm ki. Bir metr torpaq veriblər, odur. Onlardır, Ramiz Mehdiyev arxalarında durub, Azərbaycanda hər yeri zəbt ediblər. Hər halda məndə olan məlumatlara görə, yoxlamalar gedir. İsfəndiyarın oğlunu həbs etmişdilər. Deyir ki, beş milyon verib, oğlumu qurtarmışam. Axırı nə olacaq, bilinmir. Yalançı adamdır, hamıya şər-böhtan atır. Azərbaycanda böhtan atmadığı adam qalmayıb”.