“Azercell”dən 2 manatlıq hədiyyə “oyunu”… – Foto

“Azercell Telecom”la bağlı müştəri şikayətləri artmaqda davam edir.

Sosial şəbəkələrdə mobil operatorun abunəçiləri tez-tez üzləşdikləri problemləri ictimailəşdirir, xüsusilə balansdan əsassız pul tutulması və xəbərdarlıq edilmədən xidmətlərə qoşulmaqdan şikayətlənirlər.
Tribunainfo.az xəbər verir ki, son dövrlərdə “Azercell”in tətbiq etdiyi 2 manatlıq abunə haqqı bir çox istifadəçinin narazılığına səbəb olub. Şirkətin bu qərarından sonra bir sıra abunəçilər “Azercell” nömrəsindən imtina etdiklərini bildiriblər.
İstifadəçilərin iddiasına görə, indi də heç bir xəbərdarlıq və ya razılıq alınmadan müəyyən xidmətlərə avtomatik qoşulurlar. Bu zaman balansdan xəbərsiz şəkildə vəsait silinməsi halları baş verir. Müştərilər bu cür addımları “soyğunçuluq” adlandırırlar.
Bəzi abunəçilər isə “Azercell” tərəfindən göndərilən aldadıcı SMS-lərlə bağlı narazılıqlarını bölüşüblər. Belə mesajlarda müştərilərə “balansa ən azı 2 AZN yüklə və əlavə 2 AZN əldə et” kimi vədlər verilir. Lakin istifadəçilər balanslarını artırdıqdan sonra onlara vəd edilən əlavə balans təqdim edilmir. Əvəzində isə xəbərdarlıq edilmədən başqa bir tarifə keçirildiklərini bildirirlər. Yeni tarif çərçivəsində abunəçilərə aylıq 250 MB internet və 25 dəqiqəlik şəbəkədaxili danışıq təqdim olunur. Müştərilər isə bu tarifə keçmək barədə əvvəlcədən məlumatlandırılmadıqlarını və seçim haqqının verilmədiyini qeyd edirlər.
Baş verənlər fonunda bir çox istifadəçi mobil operatorun xidmətlərindən imtina etdiyini və başqa şəbəkələrə keçid etdiyini bildirir. Onlar hesab edirlər ki, “Azercell” müştərilərin etibarından sui-istifadə edir və onları qeyri-şəffaf üsullarla əlavə ödənişlərə cəlb edir.
Məsələ ilə bağlı qarşı tərəfin mövqeyini işıqlandırmağa hazırıq.
Gülşən Rəsul